Thisen pe YMA, Lengpui Model Branch chuan nimin khan Civil Hospital, Aizawl tan an khuaah thisen unit 34 an pe a, petute mipa 31 leh hmeichhia pathum an ni. TKP, Paithar Pastor Bial pawhin nimin khan Lawngtlai District Hospital tan thisen unit 44 an pe a, petute mipa 39 leh hmeichhia panga an ni.

Sarâng endik Lunglei District Enforcement Squad for Single Use Plastic Free chuan nimin khan an leader PC Zonuntluangi, DLAO hoin Lunglei Venglaia dawrte an endik a, dawr tam zawkah hman khat daih sarâng hman a ni tih an hmu chhuak. Single use plastic hmangtu dawrte chu an vaukhàn a, hmang tawh lo tur leh anmahni dawrtute pawh hmantir lo turin an hriattir a ni.

VC house hawng Minister of state K Lalrinliana chuan November 23, Nilaini khan Lènchím khuaah Panchayat Bhawan (village council house) a hawng. VC House hi Rashtriya Gram Swaraj Abhiyan scheme aṭanga hmuh Rs 20,00,000 hmanga sak a ni.

Zirlai chawimawi Mizoram University-a Department of English and Culture Studies chuan kum 2021 leh 2022-a MZU-a gold medalist Lalruatkimi Jongte leh Vanlalruati hnenah Lawrence Ch. Chhunga Endowment Fund for Literature & Cultural Studies an hlân. Chawimawina hian thuchei leh pawisa a keng a, a hlanna inkhawm chu November 23, Nilaini khan School of Humanities and Languages Dean’s Seminar Hall-ah buatsaih a ni. Lugsum centenary Lungsum khua chuan nimin khan an khaw kum 100 (centenary) tlin an lawm a, minister of state Lalchhandama Ralte-in a hman pui. He hunah hian tun hnaia Lungsum khua aṭanga chawimawi tlak mi thlan chhuahte hnenah lawmpuina thuchei hlan a ni.



SUMAN sawiho Lawngtlai District Level Committee on SUMAN (Surakshit Matritva Aashwasan) chu a ṭum khat nan nimin khan DC Amol Srivastava hoin an ṭhukhawm. SUMAN hi ven theih natna laka nu leh nausen thihna a thlen tawh lohna tura sorkar laipui hmalakna a ni.