India ramah hmasawnna hnathawhna atana sum hmang tlem ber dawttu tur Mizoram

India ram state hrang hrang­te hmasawnna hna thawhna (capital expenditure) tihchhuahah, Mizoram chu hmasawnna hna thawhna atan sum hmang tlem zingah a tel a, kum 2021-22 (budget estimate)-ah chuan Puducherry dawta sum hmang tlem ber a ni.

Reserve Bank of India (RBI)-in tun hnaia handbook a tihchhuaha a lan danin, kum 2021-22 budget estimate ang chuan India rama state leh union territory zinga capital expen­diture atana sum hmang tam ber chu Uttar Pradesh a ni a, cheng vbc. 1,44,540 an hmang.

Capital expenditure atana sum hmang tlem ber chu Puducherry (union territory) a ni a, cheng vbc. 1,200 an hmang. Sum hmang tlem ber dawttu Mizoramin cheng vbc. 1,833 a hmang a ni. Hmarchhak state pariat bik zingah Mizoram chuan capital expenditure atan sum a hmang tlem ber a; sum hmang tam ber Assam chuan cheng vbc. 23,151 an hmang thung.

Tun hnai kum 10 chhunga Mizoramin capital expenditure atana sum a hman tam ber kum chu 2017-18 kha a ni a, cheng vbc. 2,297 a hmang a ni.