MADC-a MNF+Congress sorkar inṭâwm paih a ni

Mara Autonomous District Council (MADC)-a MNF leh Congress party-te sorkar inṭâwm, chief executive member H Malvina kaihhruai chu nimin khan paihthlak a ni.

Member of district council (MDC) 25 awmna MADC-ah hian No Confidence Motion thehluh a ni a, nimin chhûn khan MADC sorkar chu bûk niin, secret ballot hmangin vote thlak a ni. MDC 25 zinga 24-in vote an thlâk a, MDC pakuain sorkar an thlàwp laiin, MDC 15-in sorkar paih an duh a, MADC sorkar chu paih a ni ta a ni.

MADC-a MNF leh Congress party-in sorkar inṭâwm an siamah hian sorkar lamah MDC 13 an awm a, chu'ngte chu MNF member pakua leh Congress member pali an ni. Eptu lamah BJP-in member 12 an nei thung.

Siahaa aṭanga thu dawn danin, no confi­dence motion pu luttu chu BJP member L Priscilla a ni a; sorkar bûknaah hian MNF member pathumin CEM H Malvina an thláwp lo a ni.

Kumin May 5 khan MADC inthlanpui neih a ni a, May 9-ah vote chhiar a ni. Phúrà bial aṭanga thlan tlin, CEM H Malvina, Congress MDC kaihhruai MNF+Congress sorkar inṭâwm lak luh zui a ni a; Amotlah biala thlan tlin MNF MDC HC Lalmalsawma Zasai chu deputy CEM niin, N Viakhu, MNF chu MADC chairman a ni thung.