Mizoram din thar leh nan ZPM-in theihtawp kan chhuah - Lalduhoma

ZPM leader Lalduhoma chuan, Mizoram din thar leh nan ZPM party-in theihtawp an chhuah thu a sawi a; ZPM working president K Sapdanga chuan, an party-in hma an sawn danah an lawm hle thu a sawi bawk.

November 24, Ningani zan khan ZPM Mamit Central Block huaihawtin Mamit Bazar Veng VC Hall-ah vantlang inkhawm neih a ni a; thu sawitu Lalduhoma chuan, "Kan ram din thar leh nan tiin theihtawp kan chhuah a, kan Working President nen Zoram dung leh vâng, chhak leh thlangah kan suar tluan reng a, kan hruaitu dangte pawh an thawkrim hle," a ti.

Lalduhoma chuan, zirchianna nen kum hnih chhung an buatsaih hnuah policy an peih tawh tih sawiin, "Mamit district sik leh sá mil zawng tak thlai awm sa te, kan thiam sa leilung behchhan eizawnnate'n ZPM policy-ah hmun pawimawh tak an luah a ni," a ti a; Mamit district-a Langkaih, Teirei leh Tut lui nghêng khuate nen multi-purpose project duang turin remchang an dap dawn tih a sawi.

ZPM working president K Sapdanga chuan, ZPM hotute'n Vangpui Fehchhuah buatsaihin Zoram dung leh vâng an fang mek tih sawiin, "Report aṭanga a lan dan leh kan party-in hma kan sawn dan ngaihtuahin kan lawm em em a ni. Tunah hian Assembly House-ah opposition party lian ber kan lo ni ta," a ti.

K Sapdanga chuan, party dangte'n phuahchawp nen nasa takin ZPM an bei tih sawiin, "A ṭhente phei chu Mizo leh Mizo inbeih nan a uchuak mah mah em aw tih tur hial a ni," a ti a; beihna an tawhte chu mipuite'n an awih lo tih mipui sûkthlêk aṭangin a hriat theih thu a sawi.