Regularisation scheme hman hnuah mi 900 chuang dah ngheh an ni tawh - Deputy Chief Minister

Provisional Employees Association of Mizoram (PEAM) chuan nimin khan Vanapa Hall-ah General Assembly vawi khatna an hmang a; khuallian Tawnluia, deputy chief minister chuan, regularisa­tion scheme hman a nih hnuah sorkar hna a nghet loa thawk mi 900 chuang dah ngheh an nih tawh thu a sawi.

Deputy Chief Minister chuan, sor­karin provisional emplo­yee-te a ngaihthah lo a, an hamṭhatna tur hrang hrang a siam tih sawiin, "Reguralisation scheme hman a nih hnuah provi­sional employee 900 chuang dah ngheh an ni tawh. Provisinal employee lakna tur inkaihhruaina mumal tak siam a ni a, sorkar hna a ngheta thawk tur lakte ang thoin guidelines felfai tak dung zuia lâk a ni ṭhin," a ti.

Provisional employee chuan a ngheta thawk an tlukpuite hlawh chanve (50%) an lak thu sawiin Tawnluia chuan, "Incre­ment pawh kum tin 4% pek an ni a, casual leave bakah, maternity leh pater­nity leave an la thei. TA/DA an bill thei a, medical reimbursement siamsak niin, an hlawh aṭanga 4% an bill thei," a ti a; ṭha taka hna thawk tur te, hotu­te thu awiha zah thiam tur leh dawr nuam ni turin pro­visional employee-te a fuih.

Deputy CM chuan, provisional employee-te pension scheme leh hamṭhatna ngaihtuahtu tur study team din a nih thu sawiin, "Vawi hnih an ṭhutkhawm tawh a, duh angin thil a la puitling vut vut thei lo. An zirchianna sorkara thehluh hun atana ruat November 30, 2022-ah an submit hman dawn loh avangin hun kan pawtsei a, zirchianna an nei mawlh mawlh a ni," a ti. Provisional employee-te chu a nghet loa thawk ni mah se, a ngheta thawkte ang thoa hamṭhatna dawng an nih avangin trade union hnuaia sorkar karnaah an inhman a rem loh thu a sawi a; Assembly pualin Rs 30,000 a hlan.

Tarlan danin, Mizoram sorkar hnuaia department 50-ah provisional employee mi 8,112 an awm mek a; PHE department-ah tam berin mi 2,010 an awm a, Power & Electricity department-ah mi 1,780 leh PWD-ah mi 1,100 an awm.

Assembly hi PEAM president Lalchamliana Tlau-in a kaihruai a; rorel, hruaitu thar thlanna leh member thite sûnna hun an hmang a, resolution pali an pawm. Kum 2023-24 chhunga office bearer tur an thlang a, president atan K Vanlalnunpuia leh general secretary atan RK Zirliana an thlang a ni.

PEAM ASSEMBLY RESOLUTION
1) Provisional employee-te status ṭha tak min siamsak avang leh regularization scheme hman a nih theihna atana austerity measure min hlihsak avangin sorkar chungah lawmthu kan sawi.
2) Hlawh kan khawl ṭhen ve theih nana Mizoram sorkarin bank deposit min ruahmansak mek hi hman kan remti tlang a, a rang lama bawhzui ni rawh se.
3) Study group-in guideline min siamsak ruala 'The Mizoram New Define Contributory Pension Scheme for Provisional Employees, 2018' duan tel tawh, tun thlenga tihpuitlin loha awm hi a rang thei ang berin Mizoram sorkarin min tihpuitlinsak rawh se.
4) Provisional employee-te dinhmun la famkim lo leh felhlel laite uluk taka ennawn a, siamṭhat ngai laite famkim zawka min thuam ṭhatsak turin Mizoram sorkarin a ennawntu tur study group din leh rawh se.