Ram siamṭha turin hruaitu ṭha nih a ngai - TJ Lalnuntluanga

MNF adviser TJ Lalnuntluanga, minister of state chuan, ram siam­ṭha turin hruaitu ṭha nih a ngaih thu leh, MNF chu hruaitu ṭha hnuaiah an kal avangin nasa taka hma an sawn thu a sawi.

TJ Lalnuntluanga hian nimina Mizo Hnam Runa inkhawmah thu sawiin, "Leader ṭha hnuai loah chuan dinhmun a sawh ngheh theih loh a, leader ṭha nei lo chu a tàwpah an tluchhe leh nge nge ṭhin. MNF party hi leader ṭha hnuaiah kan kal a, kan ram pawhin nasa takin hma a sawn zel. Pathianin min hruai a, kan hmalaknate mal a sàwm a, chak takin kan thlen chinah kan hmalaknate kan tihlawhtling zel dawn a ni," a ti.

MNF Adviser chuan, "Pathian rinchhan chungin Pathian leh kan ram tan tih thuthlung vuantute kan nih angin Pathianin min hruai zel a, a lama rilru dik tak kan put chuan Pathian leh mipui zarah kan sorkar leh ngei dawn a ni," a ti a; Pathian tel lo chuan hmasawnna tak tak a awm loh thu a sawi.

Social media khawvel a ni a, mi tinin internet an khawih tih sawiin TJ Lalnuntluanga chuan, "Party ṭhenkhatte'n mipui hriat turin thu dik leh dik lo pawh hre loin an rinthuin, a chhe lam záwngin an duh lai lai an thehdarh a, thu dik a ni em tih kan finfiah hmasak a ṭul. Chanchinbumite pawhin kan ram siamṭhatna tur a nih chuan mipui hriat turin hmalakna ṭhate kan hrilhhriat a pawimawh em em a ni," a ti.