Tualbung khuain kum 100 tlin an lawm

Tualbung khua chuan an khaw kum 100 (centenary) tlin November 24, Ningani zan khan an lawm ṭan a, Ningani zan leh nimin khan bialtu MLA Lalrinliana Sailo, Assembly speaker leh Art & Culture minister R Lalzirliana ten an hmanpui.

Lalrinliana Sailo chuan Ningani zan khan Tualbung Community Healthcare Scheme a tlangzarh a; Tualbung khuain health care scheme ṭha leh felfai tak ngaihtuah nachang an hria chu ropui a tih thu sawiin, "Khaw dangte tan entawn tlak a ni," a ti.

Lalrinliana Sailo chuan, Tualbung khuain an kum 100 tlin an lawmna chuan inlungrualna ṭha thlen se a duhsak thu sawiin, inhuatna leh inhliam palh tawhnaahte inngaidam tawn turin a chah. Speaker hian Tualbung khuaa kum 70 chung lam mi 47 hnenah blanket a hlân a, centenary lawmna leh hall sak zawmna atan Rs 2,00,000 a pe bawk.

Minister R Lalzirliana chuan Tualbung kum 100 tlin lawmna nimin khan a hmanpui a, centenary souvenir leh C Lalngaihzuala’n Tualbung chanchin a ziahna ‘Aw Bungkhawpui’ tih a tlangzarh.

R Lalzirliana chuan, a pianna khua Tualbung kum 100 tlin lawmna a hmanpui thei chu a lawm thu sawiin, "Tualbung khua hi rambuai hma aṭang tawhin khaw taima leh thawk rim, mahnia intodelh leh mi dangte pan buai ngai lo an ni," a ti.

Tualbung khuain kum 100 tlin an lawmna pual hian sial pakhat leh vawk pasarih talh a ni a, senso phuhrûk nan R Lalzirliana'n Rs 1,00,000 a pe.

Tualbung khua hi Pawih-bawiha Sailo hoin din a ni a, rauhsan a nih hnuah a fapa Thangkama Sailo hoin kum 1890 velah an luah leh a ni. Tuna Tualbung khaw kum 100 tlin lawmna hi Tiluia Sailo-in kum 1921-a Tualbunga a kài leh champha a ni a; nikum khan hripui léng vanga an lawm theih loh hnuah kuminah an lawm a ni.