Congress party-in eptu nia Krismas Kan hman hnuhnung ber a ni dawn - Zodintluanga

Mizoram Pradesh Congress Committee (MPCC) treasurer Zodintluanga Ralte, MLA chuan, kumina Krismas thleng tur chu Congress party-in eptu nia Krismas an hman hnuhnung ber a nih dawn thu leh Congress party chuan mipui an bum ve dawn loh thu a sawi.

Zodintluanga Ralte hian nimin khan a bial, Thorang constituency-a khaw hrang hrang fangin, Putlungasih leh Kauchhuah inkar rigid pavement road km. 3.72-a thui lawmna a hmanpuinaah thu a sawi a, "Congress party mipuite'n kumin hi eptu party nia Krismas kan hman hnuhnun ber a ni tawh dawn a, MNF sorkar hi an khawngaihthlak letling tawh zawk," a ti.

MPCC Treasurer chuan, "MNF sorkar hian mipuite a theihna zawng zawngah min sáwr fû a, min sáwr fû hneh lutuk a, MNF sorkar lakah hian Mizoram mipui an beidawng tawh tak zet a ni," a ti a; MNF sorkarin mipui aṭanga sum an hmuh theih dan turah zah leh mualpho dáwn loin kawng an dap nasat thu a sawi.

MNF party mi tam zawkte'n MNF nih an zak tawh nia sawiin Zodintluanga chuan, "An sorkar theihna tura SEDP-a cheng nuai 3 sem tum kha cheng sing 5-ah an tlahniam a, an sem dawn tak takah phei chuan Rs 25,000-ah an tlahniam leh. MNF party hruaitu tam zawk chu SEDP chungchang sawipui dawnin an beng an dawh ṭha duh tawh lo," a ti.

Zodintluanga Ralte chuan, MNF sorkarah mipui an beidawn lutuk avangin hmun tinah Congress party zawm thar an pung nia sawiin, "Congress party chuan mipui kan bum ve dawn lo," a ti a; kut hnathawk, sumdawng, bank leh sorkar hnathawkte'n Congress sorkar an mamawh niin a sawi.

MPCC Treasurer chuan, Congress party-in mipui an tithlàwn ngai lo nia sawiin, "Kum 2023-a inthlan manifesto atan pawh ṭang puihna atan cheng nuai bi aṭanga mamawh inṭâwm atana a hman tur a nih phei chuan vaibelchhe tél thlengin ṭanpuina pek a ni ang, tih a ni," a ti bawk.