State páwn aṭanga vawk sa la lut lo turin vawk vulhtute'n CM an ngen

Mizoram Pig Farmer Association (MIPFA) chuan Mizoram páwn aṭanga Mizoram sorkarin agency kaltlanga vawk sa lak luh a tum chu kaltlangpui lo turin chief minister Zoramthanga an ngen a; an lehkhaah chuan, vawk pûl hri, African Swine Fever (ASF) a lèn leh an hlauhthawn thu an ziak a ni.

MIPFA chuan, Mizoram sorkarin state dang aṭanga agency kaltlanga vawk sa lak luh a tum chu pawi an tih thu tarlangin, "ASF a la reh loh avang leh kan tual vawk sa man thlengin hun lo kal zel turah harsatna min siam thei thil a nih avangin la lut lo turin CM kan ngen," an ti a; October 12, 2022-a sorkar hotute nen an ṭhutkhawmnaah AH&Vety department hotute pawhin Mizoram páwn aṭanga vawk sa lak luh a la hun lo an tih thu an sawi tih an tarlang.

CM hnena lehkha an thehluhah hian MIPFA chuan, kum 2021 leh 2022-ah Mizorama vawk vulhtute'n vawk pûl hri ASF avangin vawk tam tak an chán tih an tarlang a, "Kan rûmin kan mangang tak zet. Pathian zarah hrite ziaawm chhoin, sorkarin vawk suata hma a lakna zarah vawk pawh kan vulh ṭan a, tunah khamkhawp la thar rih lo mah ila, tun aṭanga rei lo têah kan vawk sa thar dinhmun a pangngai leh thuai turah beisei a ni," an ti.

Aizawl City Vawksa Zuar Association (ACVZA)-te'n state dang aṭanga vawksa lak luh an dil chungchangah October 12, 2022 khan AH&Vety Secretary hoin MIPFA, ACVZA leh AH&Vety department hotute an ṭhutkhawm thu an tarlang a, "Meeting-ah hian MIPFA chuan kumin March thlaa ASF lêng nawn leh ang kha a thlen leh hlauin vawk sa lak luh a la hun loah kan ngai," an ti a; Vety official leh technical mite pawhin vawk leh vawk sa lak luh a la hun loa an ngaih thu an sawi.

Chutih laiin, state dang aṭanga agency kaltlang vawk sa la lut turin sorkarin ruahmanna a siam tih sawiin MIFPA chuan, "Hei hian hri mai bakah, kan tual vawk man thlengin hun lo kal zel turah harsatna min siam thei a, a pawi kan tiin kan rilru a na tak zet," an ti.