Hriselna lama thawktute an ṭawngkam leh chetziaah fimkhur turin chah

Tuivawl bialtu MLA Lalchhandama Ralte, minister of state chuan nimin khan a bial chhung Darlawna Rs 1,36,12,690 senga sak Primary Health Centre (PHC) building thar a hawng a, hriselna lama thawktute chu an ṭawngkam leh chetziaah fimkhur turin a chah.

Lalchhandama Ralte chuan Covid-19 avangin harsatna hrang hrang karah sum harsatna tawk chung pawh a, mipuite hman ṭangkai theih tur PHC hawn a ni thei chu lawmawm a tih thu sawiin, "Tun hnaiah kan bial chhung khawtinah sorkar duhsakna avangin hriselna lamah hmasawnna tam tak hmuh tur a awm zel a, sub centre leh health centre te a awm vek tawh a ni," a ti.

Hripui avanga hun harsaah pawh Darlawn PHC-a thawktute doctor, nurse, medical staff dangte leh NGO hruaitute thawhhona ṭha an neih avangin harsatna lian tham a awm lo chu a entawntlak a tih thu sawiin, "Tihdam hna thawktute chu an hnathawhnaah an tawngkam leh an nunchangte atang ringawt pawhin damloten damna an chang thei a ni," a ti a, an ṭawngkam leh an chetziaah fimkhur turin a fuih.

Darlawn PHC building hi NABARD RIDF XXIV sum aṭanga sak niin ni 6.4.2020 khan sak ṭan a ni a, ni 13.9.2021 ah sak zawh a ni.

Buliding ground floor-ah male ward, female ward, operation theatre, labour room & induction room, casualty, nursing station, pharmacy, toilet leh waiting room a awm a, basement-ah hian office, OPD, toilet, waiting room a awm bawk.