Governor-in Architects Meet a hmanpui

Mizoram Architect Forum (MAF) chuan nimin khan Administrative Training Institute (ATI) Auditorium-ah Architects Meet 2022 an buatsaih a, Governor Hari Babu Kambhampati-a'n a hmanpui.

Architects Meet hi MAF president Lalrinzuala Ralte-in a kaihruai a, seminar leh sawihona hun hman a ni. Mizoramah architect hna thawka eizawng zingah MAF member 100 chuang an awm.

Governor chuan, tun hma aiin architect mamawhna a san tawh thu leh architect-te ràwn nachang hriat a ṭul thu sawiin, "Mizoramah ram zau tak tak leh hmun rem ṭha duh anga zau kan nei thei lo a, in sak dan leh hmun àwl kan hnawhkhah danah fimkhur zual bik a ngai. Aizawl khawpui tâwt lutuk leh Mizorama district khawpui lian deuhahte pawh kan inhnawh tâwt mek a ni," a ti.

Hari Babu Kambhampati chuan, architect-te chu khawvel sik leh sa danglam zel siamṭha zawnga ke pên tur leh ngaituahna séng tur te, environment nghawng thil ngaihtuah hmasa ṭhin tur te, Mizorama kawlphetha indaih lohnate hriaa in chung design an siamah nizung chakna hmanga kawlpetha siam uar turtein a chah a ni.