KHAWTHLIR

Kohhran Hmeichhe Ni
Nimin November 25 kha Kohhran Hmeichhe Ni vawi 26-na a ni a, Presbyterian tualchhung kohhrana Kohhran Hmeichhiate'n an hmang. Kohhran Hmeichhe Ni hi kum 1997-ah hman ṭan a ni a; kumina Kohhran Hmeichhe Ni thupui chu 'Nute leh fanau enkawl' tih a ni.

MLA-in Ph.D. hmu
Lengteng bialtu MLA L Thangmawia chuan Mizoram University aṭangin doctor of philosophy (Ph.D) a hmu thar a, a thesis title chu 'Effective of ICT in Mathematics Education in Mizoram' tih a ni.

Jubilee lawm
YMA, Tuichangral North Group chuan November 21-25, 2022 chhung khan an group kum 60 tlinna, diamond jubilee an lawm a, nimin khan Sialhawk community hall-ah a lawmna pui ber an hmang. Diamond jubilee lawmna hi W Chhuanawma'n a hmanpui a, jubilee hriatrengna lungphun a hawn bakah, souvenir a tlangzarh a ni.

Pipe phûm dawn
SIPMIU-in vawiin aṭangin Vaivakawn Bazar bulah pipe an phûm dawn a, hei vang hian Traffic SP Rodingliana Chawngthu chuan lirthei tlân dan tur a tichhuak. Hna thawh chhungin Kanan Veng leh Seventhday Tlang lam aṭangin one way-in Vaivakawn lam pana tlân tur a ni a, Vaivakawn lam aṭangin Kanan Veng leh Seventh Day Tlang lam pana tlan phal a ni lo.

MLA-in canteen hawng
Lawngtlai East bialtu MLA H Biakzaua chuan nimin zing khan MLA Local Area Development Fund Rs 5,00,000 sénga Lawngtlai College canteen sak thar a hawng. MLA chuan, ṭhahnemngai taka thawk turtein college hotute a fuih.

Kum 50 tlin lawm
Lungdai Middle School - II chuan November 24, Ningani khan an sikul kum 50 tlin lawmna an buastaih a, bialtu MLA K Laldawngliana'n a hmanpui. MLA chuan, "Mizoram sorkar zirna a ngai pawimawh a, Lungdaihah hian SEDP zirtirtu pathum a ruai mek a, kan bial chhung sorkar sikul hrang hrangah zirtirtu indaih lohna phuhruk nan khaw 18-ah SEDP zirtirtu 27 min rawih sak mek bawk," a ti.