Minority Affairs Minister a rawn zin ; UC thehlut vat turin official-te a chah

Union Minority Affairs minister of state John Barla chu Mizorama zan hnih riak turin November 26, Inrinni khan Aizawl a rawn thleng a; Secretariat conference hall-ah Mizoram sorkar hotute ṭhutkhawmpuiin, Mizorama Pradhan Mantri Jan Vikas Karyakram (PMJVK) kalpui dan leh harsatnate a sawipui.

John Barla chuan, a hun taka Mizoramin sum a hmuh theih nan Mizoram sorkar hotute chu a hun takah sum hman nemnghehna, sorkar laipuiah utilisation certificate (UC) thehlut ṭhin turin a chah a; Mizorama harsatnate chu chinfel dan kawng zawnpui a tum thu a sawi.

Inkawmhonaah hian District Council Affairs & Minority Affairs (DCMA) department hotute chuan, Mizoramin PMJVK kaltlanga sum a hmuh zat te, hmasawnna hna hrang hrang thawh mek dinhmun leh project pawimawh zualte an tarlang a; directorate an neih loh thu te, administrative cost pek an nih loh thu leh, thawktu indaih loh vangin geo-tagging lamah an hnufûm bik thute Union Minister an hrilh.

Minister John Barla chuan, harsatna an tawhte chu a theih ang angin sorkar laipuia secretary sawipui a, chinfel dan kawng a zawnpui tur thu a sawi a, "Hetiang harsatnate hi a hmuna lo kal loh chuan a hriat theih loh avangin harsatna awmte chinfelpui a, project-te dinhmun hriat chian ka duh vanga rawn zin ka ni," a ti.

Mizoramin a hun takah sum a hmuh theih nan a hun takah sum hman nemnghehna lehkhabu UC-te sorkar laipuiah thehlut vat ṭhin turin Mizoram sorkar hotute a chah a ni.

Inkawmhonaah hian MLA Dr BD Chakma, DCMA secretary Dr Lalrozama, Social Welfare & Tribal Affairs (SWTA) link officer KT Beichho bakah, DCMA leh SWTA department hotute an tel.

PMJVK hi DCMA department-in kum 2020 aṭangin an enkawl ṭan a; Mizoram ICT department nen high school eng emaw zatah smart classroom dah a nih bakah, Tuidam leh Chawngteah phûl lem phah hna thawh a ni.

John Barla hian Inrinni vêk khan chief minister Zoramthanga chu CM banglaah a kâwm a, Mizoramah minority awm mah se, India ram pum thlir chuan Mizorama chengte chu minority anga ngaih theih an nih thu CM a hrilh.

John Barla chuan, Mizoram sorkara DCMA leh SWTA department hotute nen meeting an neih thu leh an rorel tlangpui a sawipui a; minority hrang hrangte chu ram hmasawnaah thawh hlâwk tak tak an nih thu sawiin, "Ram hruaitu langsar tak takte hi Kristian zirna-in aṭanga zir chhuak an ni," a ti.

Union Minister hian Governor Hari Babu Kambhampati pawh Raj Bhavan-ah a kâwm a, sorkar laipuiin hnam tênau leh hnuaihnung (minority)-te chawi kânna tura hma a lakna leh Mizoram kaihhnawih minority-te hamṭhatna chungchang a sawipui a ni.