Mizoram sorkarin central-ah Professional tax tihsan a rawt

November 25, Zirtawpni khan Union Finance minister Nirmala Sitharaman hoin New Delhi-ah state sorkara Finance minister-te'n Pre-Budget (2023-24) Meeting an nei a; Mizoram aiawha tel Taxation minister Lalchamliana chuan professional tax tihsan a rawt.

Ṭhutkhawmah hian Lalchamliana chuan, "State dangte leh keini pawhin kan lo thlen tawh ang leh Finance Commission-te'n rawtna an thlen tawh angin, professional tax kum khat atâna lak theih zat bituk Rs 2,500 hi tihsan ni se. State-te tân revenue hmuh belhna tur kawng a ni thei ang," a ti.

Special Assistance to States for Capital Investment (SASCI) chu hmasawnna hna thawh nan a ṭangkai hle tih sawiin Taxation Minister chuan, kum 2023-24 ah pawn chhunzawm zel a rawt a ni.

Lalchamliana chuan, revenue expenditure-a deficit nei state-te tan Special Assistance to States for Revenue Expenditure (SASRE) chu SASCI ang zûlzuiin kum 50 hnua rulh tur a pung (interest) awm loin loan siam ve ni se ṭha a tih thu a sawi a, "SASCI guideline-a PMGSY leh JJM-ahte state matching share phal a ni kha keini ang state chu min chhâwk hle a ni," a ti.

SASRE siam a rem loh pawhin, SASCI aṭangin external aided project (EAP)-ahte counterpart funding phal ni se a duh thu sawiin Lalchamliana chuan, "Special category state ho tan central leh state sum intum sem (sharing pattern) tun hnaia thlak a nih hnu hian state tum tur a lian lo," a ti a, SASCI aṭanga EAP sum pek phal a nih chuan hmasawnna atâna hmalaknaah state sorkar a chhâwk zângkhai theih tur thu a sawi.

Mizoram Taxation Minister chuan, state dangte pawhin an rawt angin sum pek theih zat tuna kalpui mek ang, GSDP aṭanga 3.5% tal chhunzawm ṭha a tih thu a sawi a, "15th Finance Commission ruahmanna anga kum tina Post Devolution Revenue Deficit Grant (PDRDG) kan hmuh tur tlahniam zel thlirin hei hi a ṭul tak zet a ni," a ti.

Miniser Lalchamliana hi Finance commissioner Vanlalchhuanga'n a ṭawiawm a ni.