ACB-in skywalk leh ropeway chhui zo

Chaltlang leh Durtlang inkara ropeway siam leh Sakawrhmuituai tlanga skywalk siam chungchanga Lokayukta-a thubuai thehluh chhui tura ruat Anti Corruption Bureau (ACB) chuan an chhui zo tawh.

Vanglaini thu dawn danin, ACB hian ropeway leh skywalk chungchang an chhui zo tawh a; mahse, hotu sang zawk leh dan lam thiamte'n an chhuina report an endik mek. Report endik zawh hunah Lokayukta-ah thehluh a ni ang a, Lokayukta-in an zir chian hnuah thubuai kalpui zel dan turah thutlukna an siam ang.

Tarlan tawh angin, MNF party-a Vigilance department leh Legal Board-te chuan skywalk leh ropeway siamnaah thil dik lo a awm nia ngaiin November 22, 2021 khan Lokayukta-ah complaint an thehlut a ni.

December 7, 2021 khan chhui phal dilna Mizoram sorkara Vigilance department-ah thehluh a ni a; Vigilance-in a zir chian hnuah December 17, 2021 khan chhui phalna a tichhuak a, ACB chuan December 22-ah chhui phalna an dawng.

Tourism department pawhin skywalk leh ropeway chungchang hi chhui chian ṭha an tih avangin an Director hmingin February 3, 2022 khan Lokayukta-ah an thlen. Chhui ṭul an tih chhan te, contract agreement te, contract amount te, rinhlelh an neih leh neih lohte leh thil dang dang Lok-ayukta chuan Tourism department a zawt lêt a ni.

Tourism department chuan Lokayukta zawhna hrang hrangte an chháng a; rinhlelh an neih leh neih loh zawhnaah erawh chuan, rinhlelh mimal/ company tarlan an nei lo a ni.