Siahaah Crops Exhibition buatsaih

All Mizoram Farmers' Union (AMFU), Siaha district chuan November 26, Inrinni khan Siaha District Playground-ah silver jubilee lawm pahin Crops Exhibition an buatsaih a, minister of state Dr K Beichhua'n a hmanpui.

Exhibition-ah hian loneitute bakah, Agriculture, Sericulture, Horticulture, Fishery leh AH& Vety department-te'n mipui dawr theih turin an thar chhuah thil hrang hrang zawrhna dawr an siam a; ran vulh, sangha khawi, thlai, thei, pangpar, buh leh bâl leh thil dangteah intihsiak a ni.

Intihsiakah hian Queen of the Exhibition atan Fishery department hnuaia lawmman pakhatna dawngtu sangha Grass Carp thlan a ni a, King of the Exhibition atan thlai rah category hnuaia pakhatna maí (pumpkin) thlan a ni bawk.

Minister Dr K Beichhua chuan, ram ropui leh changkangte chu agriculture leh a kaihhnawihah an ngêlnghet tih sawiin, "Ram danga thawn chhuak thei khawpa intodelhte an ni ṭhin. Kan vanneih a, Mizoram leilung leh sik leh sa hi ran vulh nan leh thlai leh thei chi hrang hrang chìn nan a ṭha tâwk a ni," a ti.

Loneitute leh ran vulhtute'n an ràwn theih turin line department hrang hrangah mithiam an awm tih sawiin Beichhua chuan, "Ei leh bara intodelh tur chuan taimakna chiah kan mamawh," a ti a; Siaha district ṭhalaite chu district páwn leh ram páwn ṭhalaite'n mahni kutkea ding thei tura an thawhrimna entawn turin a chah.

Minister hian Crops Exhibition cum Silver Jubilee lawmna pual hian Siaha district AMFU hnenah Rs 1,00,000 a pe a; MADC chief ecxecutive member H Malvin leh district bawrhsap Lalsangliana te pawhin thu an sawi a ni.