Union Minister-in Lawngtlai a tlawh

Union Minority Affairs minister of state John Barla chuan nimin khan Lawngtlai district-a hmasawnna hnathawh mek leh hmunhma pawimawhte a tlawh a; Lawngtlaia sorkar hotute nen sorkar laipui hnuaia hmasawnna hnathawhte an sawiho bawk.

John Barla hi nimin khan Lairam Isua Krista Baptist Kohhran (LIKBK) Centre Church, Lawngtlai Bazar Vengah chawhmaah a inkhawm a, inkhawm bànah kohhran hruaitute nen an inkâwm a ni.

LIKBK hruaitute nen an inkawmnaah John Barla chuan, India ramah Kristiante chu minority an nih thu sawiin, "Ram hmasawnna kawngah erawh chuan Kristiante leh kohhranin a thawh hlâwk hle. Kohhran kaltlanga ram leh khawtlang tana rawngbawlna hi ka ngaihlu a ni," a ti a; kohhran hruaitute'n sikul leh damdawi-in kaltlanga an rawngbawlnaa mamawh an thlente chu a theih anga tihhlawhtlinsak a tum thu a sawi.

Union Minister hian Lawngtlai DC conference hall-ah Lawngtlaia state sorkar leh Lai Autonomous District Council sorkar hotute a kâwm a; sorkar laipuiin minority-te hmasawnna tur a ngaih pawimawh thu leh an tana ruahmanna hrang hrang a duan thu sawi. Sorkar hotute chu khua leh tuite'n sorkar ruahmanna an hriat a, a taka an chhawr theih nana hriattir leh anmahni ṭanpui kawngah theihtawp chhuah turin a chah bawk.

Minister John Barla hian Lairam Christian Medical Centre & Hospital, PMJVK sum hmanga Residential Sports School sak mek leh, Lawngtlai-Diltlang-Parva junction aṭanga AOC junction chhunga KMMTTP kawngpui sial mek a tlawh a; tlaiah Aizawl a pan leh nghal a ni.