SEDP sem dan hi chhuanmang rorel lanna dik tak a ni - Zodintluanga

Congress Legislature Party (CLP) leader Zodintluanga Ralte chuan, Socio Economic Development Programme (SEDP) sem dan chu chhuan-mang rorel lanna dik tak a nih thu a sawi.

Zodintluanga hian November 26, Inrinnia a bial chhung Tuisenchhuah community hall lawmna a hmanpuinaah thu sawiin, "Congress party chuan miretheite dâwm kân nan NLUP kan sem ang kan ti a, kan sem ang kan tih zat kan sem. MNF sorkarin SEDP a sem dan hi chu chhuanmang rorel lanna dik tak a ni," a ti.

CLP Leader chuan, MNF sorkarinm SEDP hnuaiah Rs 3,00,000 sem tur anga mipuia an inzawrhna chu Rs 50,000-ah an tlakhniam thu sawiin, "Rs 25000-ah an tlahniam leh a, Rs 25,000 an sem hi engtia peipun tur nge, eng atana hman tur nge tih a dawngtute'n an hre lo," a ti a; an táwngpáwng sem pawp pawp ringawt niin a sawi.

SEDP healthcare chungchang sawiin Zodintluanga chuan, "Assembly House zahawm takah Chief Minister chuan SEDP healthcare cheng nuai hnih chhungkaw tin tan a awm tih a sawi. Tun hnaiah journalist pakhatin RTI Act hmanga a zawhna chhannah chuan SEDP healthceare hi a lo awm hauh lo mai," a ti.

CLP Leader chuan ZPM chungchang sawiin, "ZPM hruaitu lúte hi ui leh kèl thlun pawlh ang mai an ni a, mipui hmuha inngeih àwm taka an lan theihna turin lu chunga kut nghatte'n an inṭawngṭai a, an inṭawngṭai lai thlalak nasa takin an vawrh darh dun a ni," a ti a; ZPM-te chu tu páwlah mah awm thei lo, páwl inkaihhruaina hnuaia awm hlei thei lo an nih thu a sawi.

Zodintluanga Ralte chuan, ZPM chu MLA hlawh sang lâk duh lo ber anga mipuia inlantir an nih thu sawiin, "Hlawh pung la hmasa saa ṭang leh si an ni. VUC-in MLA-te motor-a MLA tih tàr loh tur an tih laia MLA zinga an motor-a MLA tih a kilhna nen nghet taka kilh bet awm chhun an ni," a ti.