ZPM nasa takin kan ṭhang - ZPM Leader

ZPM leader Lalduhoma chuan, Mizoram sorkara rorel lai party-in sorkar an tichhiat ṭhin thu a sawi a, an party chu nasa taka an ṭhan thu a sawi bawk.

Lalduhoma hian November 26, Inrinni khan Mosia Picnic Spot-a Aizawl North-III ZPM Block conference leh political training a hmanpuinaah thu a sawi a; ruling party-in sorkar an tichhe ṭhin nia sawiin, "Keini chu kan ram maichàmah kan inhlan ngam tur a ni. A hnuhnung tur kan dah hmasa a, kan buai zo thin. A pek belh ṭhin tih hriain a ram leh a felna zawng hmasa ang u," a ti a, inzir reng tur a nih thu a sawi.

ZPM Leader chuan, ZPM an pung tial tial nia sawiin, "ZPM hi nasa takin kan ṭhang. Mi thar lawm thiam ang u. Hun ren a ṭul a, vawn dik pawh a ṭul. Sorkar tura inbuatsaih kan ni a, thil tê tham tê tê pawh uluk takin, tihsual hlau takin kan ti tur a ni," a ti.

ZPM working president K Sapdanga pawhin thu sawiin, "Nakkum inthlanah hian thil pahnih last minute politics leh dahkham politics-te hi kan dah nil tur a ni a, ZPM chuan thluaka sum lut hi kan hnawt chhuak hmasa ber tur a ni," a ti a; mipui laka an intiamnate an hre reng tur a nih thu a sawi.

K Sapdanga chuan, mahni ṭheuh an fel chuan Mizoram a fel tur thu sawiin, "A ṭha ber leh a chak ber nih tuma kan inel chuan kan chak ngei a rinawm, a chhan chu Mizoram sûkthlêk thlirin ZPM hi a khàn ber kan ni," a ti a; mite ngaihzàwn záwng ni tura inbuatsaih zel turin an mite a chah.

ZPM thuchhuah tarlan danin, inkhawmah hian ZPM treasurer C Lalṭanpuia'n an party mi 12 a lawm lut a ni.