MADC-ah BJP kan sorkar thuai dawn - Mizoram BJP

BJP, Mizoram Pradesh hruaitute chuan November 26, Inrinni khan an pisaah thuthar thehdarhtute an kâwm a; Mara Autonomous District Council (MADC)-ah BJP-in sorkarna an siam thuai dawn thu an sawi.

Mizoram BJP president Vanlalhmuaka chuan, kumina MADC inthlanah seat 25 zinga seat 12 chu BJP-in an la a, party mala seat la tam ber an nih thu a sawi a, "Pre-poll alliance a awm loh avangin BJP chuan hun tiam chhungin sorkarna siam turin dan ang thlapin, hma lain kan claim a ni. Chu kan claim-na chu chhanna leh ngaihsakna awm loin hnâwl kan ni. Mawhphurtute lam aṭangin democratic kalphung palzûtna a awm niin kan hria," a ti.

November 25, 2022-a MADC session-ah BJP MDC-te'n vote of no nonfidence an thlen tih sawiin Vanlalhmuaka chuan, "Chutah chuan tu mah thlêm hranpa pawh emaw, tute emaw party tih dan angin nihna leh sum leh pai offer pawh nei chuang loin, MNF party-a MDC pathum chuan BJP min support a ni," a ti.

BJP President sawi danin, a tirah chuan MNF MDC pathumin BJP an thláwp a, a hnuah MNF MDC pahnih dangin an thláwp ve leh bawk. MNF MDC-te'n BJP an thlàwp chhan chu, MNF party kalhmang leh MNF General Headquarters-a an hotu te, a bikin CM Zoramthanga kaihhruai dan ṭha an ti lo a, state-a sorkarna chelhtu ni mahse rinna an nghat ngam lo a, an duh thlannaain BJP an thláwp a ni.

Vanlalhmuaka chuan, MADC-a BJP MDC-te'n sorkarna siam tura kawng dapin, dan ang thlapin hma an la mek nia sawiin, "Hun rei lo têah BJP-in MADC-ah sorkarna kan siam thuai dawn a ni tih media kaltlangin mipui kan hriattir a ni," a ti.

Zawhna chhangin BJP President chuan, kum 2023 MLA inthlanah party mala sorkarna siam turin hma an la mek tih a sawi a, "Theihtawp chhuahin hma kan la zel ang a, party mala sorkarna kan siam thei dawn loa kan hriat chuan ruahmanna dang siam a ni ang," a ti a; party malin sorkarna siam thei lo pawh ni se, sorkarah an tel ngei tur thu a sawi a ni.