Mipa-hmeichhia thliar dona sawiho

Mizoram State Rural Livelihoods Mission (MzSRLM) chuan November 26, Inrinni khan Mizoram Rural Bank conference hall-ah Community Led Campaign Against Gender Discrimination an buatsaih a, Rural Development minister Lalruatkima'n a hmanpui.

Campaign hi Ministry of Rural Development hnuaia DAY-NRLM thuchhuak angin, India ram pumah November 25 aṭanga December 23, 2022 chhung hman tur a ni a; Mizoramah pawh MzSRLM awmna district hrang hrangah hman a ni dawn. Campaign chhungin self help group member-te hnenah hmeichhiate chunga hleilenna leh mipa leh hmeichhia inthliarna awm lo tura hmalakna chungchang zirtirna kalpui tur a ni.

Minister Lalruatkima chuan, India sorkarin hmeichhe dinhmun a ngai pawimawh nia sawiin, "Mizoram sorkar pawhin hmeichhiate hamṭhatna turin theihtawp a chhuah," a ti a; Mizoram sorkar pisa, competitive exam leh politics lamah pawh hmeichhiate'n dinhmun pawimawh tak tak an luah thu a sawi.

Lalruatkima chuan, "Sorkar chu mi harsa leh retheite tan a ding zel dawn a, khawtlang, kohhran, tlawmngai pawl leh department hrang hrang hi hmeichhiate thliar hranna tihbo a nih theih nan an thawhho a pawimawh," a ti a; hmeichhiate laka hleilenna ûm bonaah theihtawpa hma la zui zel turin MZSRLM hotute a fuih.

Campaign hawnna inkhawm hi MzSRLM chief executive officer H Lalchhandami'n a kaihruai a; mi hrang hrangin hmeichhe chunga hleilenna leh mipa leh hmeichhia inthliarna chungchanga hriat tur pawimawhte an sawi a ni.