Serlui MLA-in ramria sorkar hmalakna a fak

Serlui bialtu MLA Lalrinsanga Ralte chuan ramri khuaten hmasawnna an hmuh theihna atan chief minister Zoramthanga kaihhruaina hnuaiah nasa taka hmalak a nih thu a sawi.

November 25, Zirtawpnia Phaisen Branch YMA-in an kum 50 (Golden Jubilee) tlin an lawmna hun a hmanpuinaah thu sawiin, "Ramri humhalhna ṭha ber chu ramri khuate tihhmasawn a, development thlen tir hi a ni. Ramri khuate'n hmasawnna an hmuh theihna atan kan Chief Minister kaihhruaina hnuaiah hma nasa taka lak a ni chho ta hi a lawmawm hle," a ti.

Serlui Bialtu MLA chuan an bial chu ramri depa awm a nih angin ramri khuate'n hmasawnna an hmuh theihna atan theihtawp chhuaha hma a lak zel tur thu sawiin, "Ramria cheng mipuite kan ram humhalhna tura an inpekna te, an huaisenna te a fakawmin, a chhuanawm hle," a ti a, kan ram nghet taka kan luahzel theihna atan huaisenna leh rinawmna nen kan enkawl a ṭul thu a sawi.

Phaisen Branch YMA Golden Jubilee lawmnaah hian OB lo ni tawhte sunna hun hman a nih bakah, kum 1972-2022 chhunga Phaisen Branch YMA lo kaihhruai tawh tute chawimawina hun hman a ni.