KHAWTHLIR

28th November, 2022

ABC inkhawmpui
Baptist Church of Mizoram-a inkhawmpui lian ber dawttu, Area Baptist Council (ABC) inkhawmpui chu November 25, Zirtawpni zan khan Mizoram hmun hrang hrangah ṭan a ni a, nizan khan a ṭiak. ABC inkhawmpui hi Mizorama ABC 16-ah neih a ni a, Inrinni khan nilêngin rorel a ni. Nimin khan chawhma inkhawmah kohhran upa thlan tharte nemngheh an ni a, pastor bial 66 aṭangin kohhran upa 162 nemngheh an ni.

Meizial man
Champhai police-te chuan November 26, Inrinni khan Farluichhuahah truck pahnih aṭangin ram dang meizial báwmpui 201 an man. Meizial phurtu lirtheite hi T Lalbiakhlua (31) s/o Vanlalnghaka (L) leh Lalpapuia (33) s/o Lalrinchhana (L), Champhai Ruantlang ve vete khalh a ni a, COTPA hnuaiah thubuai ziah luh a ni.

MNYF-in lawmpui
MNF ṭhalaite chuan thuchhuah siamin, an president L Thangmawia, MLA-in ram rawngbawl hna thawk chunga Ph.D. a hmu thei chu an lawmpui thu an tarlang a, "Dr L Thangmawia hi zirna lama Mizo ṭhalaite hmakhua ngai em emtu a ni a, 'Mizoram leh Zo fate'n kan mamawh chu zirna a ni' tih hi a kalna hmun apianga a sawi ṭhin a ni," an ti.

Minister-in hmanpui
Lungleng-I Branch YMA chuan November 26, Inrinni khan an kum 75-na, platinum jubilee an lawm a, minister of state Robert Romawia Royte-in a hmanpui. Robert Romawia chuan, Lungleng-I chu khualzinte tlawh duh hmun pawimawh a nih avangin cheì zui zel turin Tourism department-in a zir chian mek thu a sawi.

PC-in pawi an ti
PC party chuan thuchhuah siamin, Mara Autonomous District Council-ah sorkarna ngêlnghet siam thei party an awm lo chu pawi an tih thu an tarlang a, "Mara mipuite'n beiseina sang tak neia an aiawha rorel tura an thlan zingah district tihhmasawnna tur aia an mimal leh party hamṭhatna tur ringawt an engto zawk vanga sorkarna mumal ding thei loa a awm hi pawi kan ti a, Mara mipui lainatawm kan ti tak zet," an ti.

P/S jubilee lawm
Mission Vengthlang Primary School chuan November 26, Inrinni khan an sikulah diamond jubilee an lawm a, Human Resource Development Board vice chairman Dr L Thangmawia, MLA-in hmanpuiin, jubilee lungphun a hawng. Bialtu MLA VL Zaithanzama'n a hmanpui bawk.