Mizoram sum dinhmun dik tak tu ma'n a sawi theih loh Rin thu pawha sawi a harsa, Pathian chauhin a hria - CM

Zoramthanga hian nimin khan thuchah a sawi a, "Covid-19 hripui kan la hriat ngai lohin min rún a, kan buai mup mup a ni. Kan nun dan zawng zawng leh economy-te min khawih vek. Zawhna a chhuak luai luai a, hrehawm kan ti tlang a ni. Zawhna tam tak awm chu, Covid-19 fund, CM Relief Fund-a kan chhùn luh engtin nge hman tih a ni. Hei hi a ngai em ni, Mizoramin sum a ngah tho alawm ni, tihte a awm," a ti.

Covid-19 vangin Mizoram sum dinhmun dik tak leh India ram dinhmun dik tak tu ma'n an sawi theih loh thu sawiin CM Zorama chuan, "Covid-19 hma chuan a sawi theih ṭhin. Budget-ah kan pass a, kan hisâp (estimate) mai mah ni se, kum hmasa lama sum lo kal dante enin, beiseinain kan sum dinhmun tur kan sawi thei," a ti a; tunah chuan sum lo kal dan tur sawi theih a nih loh thu a sawi.

Chief Minister chuan, India leh Mizoramin chhiah a hmuh tur zat sawi theih a ni lo tih sawiin, "Inrinsiak ta ila, a chanve hmuh ring, hmun thuma ṭhena hmun khat hmuh ringte kan awm ang. Kan sum hmuh tur hi tu ma'n kan hre lo a, India ramah pawh hria an awm lo, Pathian chauhin a hria. Finance Minister ka nih angin kan sum dinhmun dik tak min zawt se, ka rin thu pawh sawi harsa ka ti khawp ang," a ti.

Zoramthanga chuan, Mizo­ramin budget-ah sorkar laipui aṭangin 90% vel a hmuh ṭhin thu sawiin, "Khawvel a buai a, India ram pawh a buai a, rin thuin kan kal. India ramin harsatna lian a nei dawn a, Mizoram pawhin," a ti a; harsatna a thleng a nih pawha harsat lutuk lohna turin theihtawpin an inbuatsaih lâwk thu a sawi.

Hma lam hun tur ngaihtuahin Covid-19 dona atan CM Relief Fund-ah thawh tura insâwm a nih thu sawiin CM chuan, "Thu ka sawi apiangin CM Relief Fund-a thawh tura ngenna leh lawmthu ka sawi ṭhin. Chu chu hriain pawl, kohhran leh mimalin an rawn thawh a, pawisaa thawh remchang lo pawhin thlaite'n an rawn thawh a, a lawmawm tak zet," a ti.

Chief Minister chuan, CM Relief Fund-ah cheng nuai 764 a luh tawh thu sawiin, "A hman dan ngaihtuah turah politician pakhat mah an tel lo. Chief Secretary hoa kohhran leh YMA hruaitute'n an rèl hi chu rinhlelh­awmin ka ring lo. Vbc. 5.53 hman tawh a ni a, a ringhlel zawnga sawi hi a ngaihtuahtute rilru a tihrehawm palh a nge," a ti a; CM Relief Fund hman dan hmuh tur a awm vek thu a sawi.

Kum 2020-21 budget pass a nih laiin India ramah Co­vid-19 buaipui a la nih loh thu sawiin Finance Minister chuan, "Pawisa kan ngah a, India sorkar pawhin a ngah. Pu Zorama'n pawisa kan ngah a ni lawm ni tihte a awm a, ni e, kan ngah. Prime Minister-in Jal Shakti atan hman tur a puan ringawt pawh vaibelchhe nuai a tling a, state-in kan hman tur pawh tam kan ti. Covid-19 a lo thleng a, a chawk chhe vek a ni," a ti.

Zoramthanga chuan, Co­vid-19 vangin GST aṭanga India leh Mizoram sum hmuh tur hriat theih a nih loh thu sawiin, "Industry a chàwl a, sumdawnna a chàwl vek, ngai kan awh dawn lo. Chuvangin, fimkhur takin kan kal. Khawvel, India leh Mizoramin dam khawchhuah kan tum," a ti a; sorkar laipuiin a hranpaa state-te Covid-19 dona atana hman atan pek tur a ngah bik loh thu a sawi.

Chief Minister sawi danin, Covid-19 donaa hman tur NEC aṭanga cheng nuai 300 hmuh chu sorkar kum hmasa March lam aṭanga an tih a ni a, kum thar atan an dah avangin April 4 velah sanction a lo thleng a ni. A hranpaa Mizoram an pek a ni lo a, NEC aṭanga Mizoram chanvo tur 'Covid atan in hmang thei' an tihna a ni.

Thla hnih chhungin sum hmanna tifel turin an ti a, thla khat liam ṭâwk hnuah a hmanna DoNER Minister-in a rawn zâwt tih sawiin Zoramthanga chuan, Covid-19 chu tàwp mai tur a nih loh avangin, sum hman dan tur leh khêk dan tur ngaihtuah a ngaih thu a sawi.

CM Zoramthanga chuan PPE lei chungchang sawiin, "Hun buaithlak tak kan tawng a, mi a barakhaih a, kan inbuatsaih hman lo. Health lama thawktu invènna kan neih chhun tih tham a ni lo a, a neih dan tur kan dap. A thleng hlim kan inchuh a, a chuh chak páwl kan ni hlauh. A ṭha em tih en hman a ni lo, parcel-ah a awm tawp. Kan lâk ang tho state dang pawhin an la a, thubuaia lâk tum chi pawh a ni lo," a ti.

•    Supply atan Covid-19 vang liau liauin cheng nuai 24.56 hman a ni. Hei hi a thlàwna mi harsate buhfai pek tur leina atan a ni a, Prime Minister-in thla thum chhung atana buhfai a thlàwna sem tur a tih atan pawh sorkar laipui aṭangin pawisa dawn a nih loh avangin state sum hman a ni. PM-in a thlàwna buhfai dawng tura a tihin a huam loh mi harsa task force-in an thlan chhuahte pawh a thlàwna pek an ni. Covid-19 vangin buhfai phurh man leh labour man a to.

•    Health department hnenah Covid-19 vang liau liauin cheng vbc. 19.57 pek a ni.

•    Sorkar laipuiin State Disaster Respond Fund aṭangin Covid-19 atan cheng vbc. 7 hman a phal. Hei pawh hi state pawisa neih sa pangngai, Central-in Covid-19 atana hman a phal tâk a ni a, a hranpaa dawn a ni lo.

•    Sorkar laipuiin a phal angin Covid-19 vangin state sorkar sum tho LESDE aṭangin cheng vbc. 21.26 hman a ni. A hmanna chu welfare member-te a thlawna buhfai pekna atan leh member tinte Rs. 3,000 pek atan a ni.

•    Covid-19 in kan nun dan zawng zawng leh economy a khawih

•    Finance Minister ka nih angin kan sum dinhmun dik tak min zawt se, rin thu pawh sawi harsa ka ti khawp ang

•    Khawvel a buai a, India ram pawh a buai a, rin thuin kan kal

•    Hma lam hun tur ngaihtuahin Covid-19 dona atan CM Relief Fund-ah thawh tura insâwm a ni

•    CM Relief Fund hman dan ngaihtuahtuah politician an tel lo

•    Jal Shakti hnuaia kan sum hmuh tur Covid-19 in a chawk chhe vek

•    NEC-in vbc. 3 min pek hi Covid-19 vanga a hranpaa min pek a ni lo, kan chanvo tur sa a ni