CM-in inkhàrkhip zel ṭha a ti

Prime minister Narendra Modi hoin May 11 tlai khan India rama state tin chief minister-te'n video conference kaltlangin Covid-19 vanga ram pum inkhàrkhip kal mek leh hmalakna hrang hrang an sawiho. He hunah hian chief minister Zoramthanga pawh telin, inkhàrkhip chhunzawm zel ṭha a tih thu a sawi.

CM Zoramthanga chuan, "Mizoram chu mipuiin sorkar an ṭawiawm ṭhat avang leh tlawmngai leh ṭhahnemngai taka thawhhona avangin Covid-19 vei pakhat bak kan neih belh lo a, tunah chuan Covid-19 free state kan ni," a ti.

Covid-19 lênna state leh ram dangte'n an hual vel avangin inkharkhip chhunzawm zel a ṭul thu sawiin Zoramthanga chuan, state páwna Mizoram mi leh sa tangkhangte an hawna turin rél ruahman thuai tur leh Bairabi rel chawlhhmun thlenga phur lut ngei turin sorkar laipui a ngen a ni.

Prime Minister chuan, "Novel coronavirus hi a darh zual zel lohna tura hmalak zel a ngai. Chutih rual chuan, ei leh bar kawnga hmalaknaah a him chinah chuan inthlahdul zel a ṭul a ni," a ti a; state tin aṭanga rawtna awmte chu ngaih pawimawh a nih thu a sawi.

Video conference-ah hian CM Zoramthanga hi CM Office aṭangin a tel a, Health minister Dr R Lalthangliana, Home minister Lalchamliana bakah sorkar mi pawimawhte'n an 

ṭawiawm a ni.