AMC-a hmeichhe seat tur pawh a ni

State Election Commission (SEC) chuan nimin khan Central YMA Hall-ah kumin tàwp lama Aizawl Municipal Corporation (AMC) inthlana hmeichhe tana bial (ward) hauh tur an pawt. Hmeichhe tana seat hauh tur ward-te chu - ward no. III, VIII, X, XIV, XVI leh XIX-te a ni.

SEC-a commissioner Laima Chozah, IAS (Rtd.) chuan, India ram danpui leh Mizoram Municipalities Act, 2007 hnuaia ram leh tualchhung inrêlbàwlnaa hmeichhiate'n chanvo zau zawk an neih theihna tura seat zuahsak dan tlangpui a sawi.

Laima Chozah chuan, AMC-a hmeichhe seat tur thlanna chu langtlang taka tih an duh avangin a pawhnaah tlawmngai pawl hruaitute tel tura an sâwm thu a sawi a, "Covid-19 lêngin ram a tihbuai avangin inthlan hun tur hi sawi lâwk theih ni lo mah se, hmeichhiate tana seat zuahsak thlanna hi dan pangngai anga tih a ṭul avangin vawiinah buatsaih a ni," a ti. 

SEC secretary Teresy Vanlalhruaii chuan, kum 2010 leh 2015-a AMC inthlana hmeichhiate tana seat hauh tur thlan dan a sawi a; AMC ward awm zat 19 aṭangin ward pasarih, kum 2010 leh 2015-a inthlana hmeichhe tana la hauh lote a tarlang. Hmeichhe tana la hauh lohte chu - ward no. III, V, VIII, X, XIV, XVI leh XIX-te a ni.

Hmeichhe tana seat la hauh loh ward pasarih aṭangin hmeichhe seat tur chu ward paruk pawh tur a ni a; MHIP President, MUP President, Aizawl DC, UDPA Joint Secretary, AMC Commissioner leh GAD Deputy Secretary-te'n an pawt a ni. Seat pawhnaah hian political party hrang hrang aiawh leh MPF aiawhte an tel.

Kum 2010-a AMC inthlanah ward no. II, IV, VI, XI, XII leh XVII-te chu hmeichhe seat a ni a, kum 2015-a inthlanah ward no. I, VII, IX, XIII, XV leh XVIII-te hmeichhe seat a ni. Ward no. V (Chanmari, Zarkawt, Electric Veng) chu hmeichhe seat a la ni ve ta lo a, kumin ni loa AMC inthlan leh hmasa berah hmeichhe seat a ni ang.

1.    Ward-III : Ramhlun North, Ramhlun Venglai, Ramhlun Vengthar, Ramhlun Sports Complex, Laipuitlang

2.    Ward-VII : Armed Veng, Armed Veng South, Chite

3.    Ward-X : Chawnpui, Zotlang, Zonuam, Govt. Complex

4.    Ward-XIV : Khatla, Khatla South leh Mission Vengthlang

5.    Ward-XVI : Bethlehem Veng, Bethlehem Vengthlang, College Veng

6.    Ward-XIX : Kulikawn, Tlangnuam, Saikhamakawn, Melthum, Hlimen