Hlawh thawh leh thawh loh Pawl mal leh mimal kutah dah

Covid-19 dona atana sorkar hna­thawkte'n hlawh aṭanga sum thawh tura ruahman tawh chu nimin khan tihdanglam a ni a, sum thawh leh thawh loh chu sorkar hnathawk pawl mal leh mimal kutah dah a ni.

Sorkar hnathawkte'n an hlawh aṭangin Covid-19 dona atan 10% leh 5% thawh tura thutlukna siam tawh chu Federation of Mizoram Government Employees and Workers (FMGEW) ngenna angin nimin khan sorkar hnathawk pawl hrang hrangte'n an sawiho a; chief secretary Lalnunmawia Chuaungo-in kaihruaiin, sorkar hnathawk pawl 87 aiawhte an tel.

Chief Secretary chuan, Covid-19 dona atana hmatáwnga ṭangte leh mipui ni tin mamawh ngaihtuahtute hnenah lawmthu a sawi a, "Covid-19 dona atan hian sorkar hnathawkte'n CM Relief Fund, task force leh ṭhenawm khawveng tan tam tak an thawh tawh. Service association ang a ni emaw, mimal ang pawha Covid-19 dona atan leh hripui léng mekin a nghawng Mizoram sum leh pai dinhmun siamṭhatna tura mahni duh thu ngeia sum thawh duhte tan sorkar a inhawng reng a ni," a ti.

Sawihonaah hian rawtna eng emaw zat a lut a, rawtna ṭhenkhat chu 5% thla thum chhung thawh, 5% thla khat thawh leh 10% thla khat thawhte a ni a; rawtna lut tam ber chu thla thum chhung thla tin 5% thawh a ni. Group-D aiawhte chuan an harsat avangin thawh turin tih ni ve lo se an duh a, a ṭul tak zet a nih erawh chuan an tlànchhiat bik loh tur thu an sawi.

Meeting-ah hian association 43 aiawhte'n an duh dan leh rawtna an neihte an sawi a; rawtna hrang hrang­te sawiho a nih hnuah, hlawh aṭanga Covid-19 dona atana sum thawh chungchang chu pawl mal leh mimal kutah dahin thutlukna siam a ni.