Covid-19 vei enkawlna senso atan cheng nuai sarih chuang hman a ni

Covid-19 vei State Referral Hospital (SRH)-a enkawl dam tâk Rev. VL Hruaia Khiang­te enkawlna atana senso hrang hrang belhkhawm chu a tlem thei anga chhûtin Rs. 7,13,043 a nih thu, medi­cal superintendent Dr HC Laldina chuan a sawi.

Vanglaini palaiin a kawmnaah Dr HC Laldina chuan, "Mi pakhat enkawlna atan sorkar rate-a chhûtin cheng nuai 7 vel zet sèn a ni. Covid-19 positive dang nei leh palh ta ila, thawktu hrang hrangte pawhin an zo kher lo ang tih a hlauhawm. Covid-19 kai lo tura sorkarin hma a laknate hi mipuiin kan zawm ṭhat leh zual a pawimawh a ni," a ti.

Thu dawn danin, Rev. VL Hruaia Khiangte enkawlnaa tel mi 26 an awm a; doctor panga (anesthesiologist pathum, pulmonary medicine pakhat, medicine specialist pakhat), ward superintendent pahnih, staff nurse 14 leh group-D mi panga an ni.

Thawktute chu a tìr lamah chuan darkar 12 zelah an inchhâwk a, a lum avang leh ICU-ah air conditioner hman a rem loh avangin darkar ruk zelin an enkawl chhâwk leh a ni. Rev. VL Hruaia chu ni 46 (ICU-ah ni 36 leh ICU páwnah ni 10) enkawl a ni a; amah enkawltute chuan a tìr aṭanga a chhuah hnu thlengin damdawi-inah an riah chilh. 

ICU-a an enkawl chhung zawngin personal protective equipment (PPE) thuam famkim, hmai tuamna leh kutkawrte an hman reng a ngai a; PPE pakhat man Rs. 2,700, hmai tuamna pakhat man Rs. 250 leh kutkawr Rs. 60 a ni. PPE atan Rs. 1,24,200 (Rs. 2700X46), hmai tuamna atan Rs. 11,500 (Rs. 250X46) leh, kutkawr atan Rs. 2,760 (Rs. 60X46) hmang anga chhût a ni a, a vaiin Rs. 1,38,460 a ni.

Enkawltute chu ei leh in tur hmun pahnihah siamsak an ni a, ZMC Hostel Kitchen-a an ei man Rs. 1,49,197 leh Referral Hospital Kitchen-a an ei man Rs. 3,00,000 niin, belhkhawmin Rs. 4,49,197 a ni. Mi 26-te hian tukṭhuan, chawchhûn leh zanriah atan ni khatah Rs. 8,983.94 man an ei a, ni khatah mi pakhatin Rs. 345.54 hû zel an ei ang a ni.

Rev. VL Hruaia te hian ICU-a an awm manah Rs. 2,01,510 leh pharmacy canteen-a damdawi an leina atan Rs. 48,490 an hmang a, an bill zawng zawng chu Rs. 2,50,000 a ni. Dr HC Laldina chuan, ICU-a awm man chu private hospital-ah ni se chuan a tam lehzual tur thu a sawi. Sorkarin thawktute tana a sen zawng zawng leh Rev. VL Hruai­a ten an sen zat belhkhawm chu Rs. 7,13,043 a tling.

Dr HC Laldina chuan, Rev. VL Hruai­a chu CT scan-in ṭum hnih en a nih thu leh CT scan tih dawna amah buaipui­tu zawng zawng pawh thuam famkima an inthuam vek a ngaih thu a sawi a; senso zat tlangpui chhûtnaah hian ZMC Covid-19 laboratory leh Silchar Medical College laboratory-a swab sample test-na senso a tel lo tih a sawi bawk.