Malsawmkima hnenah Rokunga Award hlan a ni

Rokunga Memorial Society (RMS) chuan Malsawmkima, Saitual Venglai hnenah nimin khan Rokunga Award 2021 an hlân. Award hlanna inkhawm hi Aijal Club-ah buatsaih a ni.

Rokunga Award dawngtu Malsawmkima chuan, Mizoramah amah aia chawimawi phû zawk tam tak an awm thu sawiin, "Khawtlang tan leh ram leh hnam tana ka thawh venaah hun harsa leh pik tak tak kan paltlang chángte leh mi huat hlawh phah khawpa thawh a ṭul châng pawha bei hrâm hrâm thei tura min siamtu chu Mizo hnam ka hmangaihna vang a ni," a ti.

Award sem inkhawm hi RMS vice chairman B Lalthangliana'n a kaihruai a, Malsawmkima hnenah Award Selection Committee chairman PC Lawmkunga, IAS (Rtd.)-in award a hlan. Chawimawina hian tro­phy, tangkapui, thuchei leh Rs 50,000 a keng.

Rokunga Award hi Mizo tlawmngaihna chhawm nung ṭhate hlan tura tih a ni a, kum hnih dana hlan tur niin, tun hi ṭum hnih an semna a ni.

Award dawngtu Mal­sawmkima hi khawtlang tana a ṭhahnemngaihna avangin kum 2006 khan misualin gelatine hmangin a in an bei tawh a, thah tuma beih leh chempuia sah tuma luhchilhte a tawng tawh bawk.