RTI Act-ah VC leh LC huamtir tum a ni ; Information Commission-in sorkar an dil mek

Mizoram Information Commi­ssion (MIC) hotute chuan, village council leh local council-te chu sorkar sum tam tak khawiha hmangtu an nih avangin, RTI Act-ah huamtir tuma hmalak mek a nih thu an sawi.

Administrative Training Institute (ATI) chuan nimin khan Aizawl Press Club-ah thuthar theh­darhtute pualin Right to Infor­mation (RTI) Act chungchang zirhona an buatsaih a; RTI Act chungchanga hriat tur pawimawh chi hrang hrangte sawiin, media hmanga mipui zirtir chhâwng turin chanchinbu mite an ngen a ni.

RTI Act chungchang zirtirtu MIC joint secretary Lily chuan, VC leh LC-te chu sorkar sum tam tham tak khawihtu leh hmangtu an nih avangin RTI Act huamtir tuma hmalak mek a nih thu a sawi a, "VC leh LC-te hian sorkar sum an khawih tam ve si a, public authority an nih ve a ngaia hriat a ni a, hmalak mek a ni," tiin, transparent atan a pawimawh thu a sawi.

VC leh LC-te RTI Act public authority an nih vena tura hmalakna thlen chin zawhna chhangin Lily chuan, "Sorkarah kan dil mek. Hman ni deuha kan zawh chuan, LAD (VC enkawltu) Secretary chuan notification kan tichhuak ṭêp tawh, a ti a. UDPA (LC enkawltu) lam chuan kan lo ennawn ang, tiin min chháng," a ti.

Ruahman dan chuan, VC leh LC-te RTI Act hnuaiah public autho­rity an nih chuan, VC president leh LC chairman-te chu DAA (departmental appellate authority) an ni dawn a, VC/LC secretary-te chu SPIO (state public information officer) an ni ang.

MIC hotute chuan, SPIO leh DAA-te zingah information pe ṭha duh lo an awm ṭhin thu leh chutiangah chuan MIC-a zualkoin awmzia a neih thu an sawi a, "A hmaa information an hmuh zawh miah lohte hi MIC-a an rawn thlen a, MIC-in pe tura a tih chuan an hmu leh mai zel," an ti a; chutih rualin, SPIO-te'n an chhàn pial loh nan zawhna zawttute pawh an fimkhur a, zawhna an uluk a ṭul thu an sawi.

RTI Act workshop sawi hawngtu ATI joint director Mark Lalthanliana chuan, RTI Act chu langtlang sorkar siamna tur hmanraw pawimawh a nih thu a sawi a, "Thil dik lo zawn chhuahna tur ngawr ngawr leh sorkar tihmualphona tur ringawt a ni lo a, politics-a inbeihna hmanrua atana tih pawh a ni lo," a ti.

MIC secretary Dolianbuaia chuan, kumin July thla aṭangin online hmangin RTI Act hnuaiah information dil theih a nih thu sawiin, "Online RTI kan kalpui hnu hian information dilna a pung hle a, MIC pawhin appeal kan dawng hnem. Online-ah hian thil kal tluang lo leh felfai lo palh a awm thei a, kan inzir zel a ngai," a ti a; RTI Act chungchangah MJA-te'n an thawh hlâwk thu leh stakeholder lian ber, hmang ṭangkai bertu nia an hriat thu a sawi.

Workshop-ah hian MJA president C Lalrambuatsaiha pawhin thu a sawi a; zawhna leh chhanna hun hman a ni.

MIC HOTUTE SAWI ṬHENKHAT
1) VC leh LC-te'n sorkar sum an khawih nasat avangin RTI Act-ah huamtir tum a ni a, hmalak mek a ni.
2) Sorkarin ṭanpuina a pek, sum zawng zawng aṭanga 30% emaw Rs 1,00,000 emaw aia tlem lote RTI Act-in a huam.
3) RTI Act hnuaia Right to Inspection tih theih a ni a, a duh tan SPIO-ah dil tur niin, MIC official-te nen sorkar document leh record-te endik theih a ni. Hnathawh kal lai erawh a huam lo.
4) Sorkar tender chhanna copy pek chhuah chungchangah third party (tender chhangtu) phalna lâk kher a ngai lo a, pek chhuah nghal tur a ni.
5) Exam answer paper dil chhuah dawnin third party phalna a ngai a, mark zat (written & interview mark) zat pek chhuah chungchangah erawh chuan third party phalna la kher loin pek chhuah tur a ni.
6) Suo Moto Discloser hmangin sorkar department/office-te'n thil chi hrang hrang 17-ah an hmalakna leh thil tihte mipui hmuh theih turin an tarlang tur a ni.
7) Suo Moto Discloser ti ṭha lo, website-a tarlang ṭha lote kan ko tawh; an ti ṭha tawh viau.
8) Suo Moto Discloser hmanga thil chi 17 puanzar ngei ngei tur hian mipuiin information kan duh ang tlangpui chu a tel vek.
9) Suo Moto Discloser hmanga tarlan ngei ngei turah budget, sum hman dan, thawktu zawng zawng hming leh nihnate a tel.
10) Suo Moto Discloser hmanga tarlan ngei ngei thil kan dil a nih chuan a thlàwnin an pe chhuak tur a ni.
11) Ni 30 chhungin chhanna pek ngei ngei tur a ni a, ni 30 a liam hman chuan a man pek ngai pek tur a ni lo a, a free-in an pe chhuak tur a ni.
12) Diltuin application man Rs 10 pekah receipt an pe chhuak ngei tur a ni.
13) SPIO-in chhanna dik lo an pe nia hriat chuan DAA-ah kal kher loin, MIC-ah zualko nghal theih a ni.
14) Online-a zawhna zawttute zingah chhànna dawn hnua zawh belh an awm ṭhin. Zawh belhna a awm thei lo a, zawh belh duh nei chuan a tharin application thehluh leh tur.