Assembly Speaker leh zirlaite inkâwm

Mizo Students’ Union chuan nimin khan 'Interac­tion Session with Speaker & Discussion on Nature of the Assembly House' an buatsaih a, zirlai 80-in Assembly House tlawhin, speaker Lalrinliana Sailo nen an inkâwm.

Zirlai 80-te chu higher secondary school leh college-a zirlaite an ni a, Assembly House an fan bakah, Speaker-in Assembly leh rorel dan kalphung a hrilhfiah a ni.

Lalrinliana Sailo chuan, Assembly committee péng hrang hrang pawimawh dan te, sorkar lai MLA leh eptu MLA pawimawh dan te, Indian Constitution chungchang te, Speaker leh MLA ni chunga a tawnhriatte a sawi a, "Kan ram roreltute hi an zavaiin mi ṭha tak tak an ni," tiin, social media-ah a chhe zawnga sawi vak vak lo tur te, zûk leh hmuam laka fihlim tur te, khawsak harsa deuhte pawh inthlahrang lo leh zam loa hlawhtling tura bei ṭâng ṭâng turin zirlaite a chah.