Minister-in Maudarh quarry chim a tlawh

Geology & Mining minister Dr R Lalthangliana chuan nimin zing khan November 14, 2022-a Maudarh khaw daia ABCI Infrastructure lung lakna (quarry) chim a tlawh. Minister chuan, chhiat tawhna hmun zir chiangtu geologist-te report sorkarah thehluh a nih tawh thu sawi.

Dr R Lalthangliana chuan, Maudarh quarry chim vanga mi 12 an thi chu pawi a tih thu sawiin, "Maudarh quarry hi Mizoram chhim lam kawng siam mek atana lung ṭha lakna pawimawh tak a ni tih sorkarin a hria a, ram leilung mila fimkhur zawka hna thawh a nih theih nan Geology & Mining department mithiamte thuràwn angin hmalak a ni ang," a ti.

Chhiattawhna hmun zir chiangtu Geology & Mining department geologist-te'n sorkarah report an thehluh tawh thu sawiin R Lalthangliana chuan, "Hmalak zel dan tur chipchiar zawka enfiah turin Geology & Mining Director hoin department thawktute an rawn kal dawn," a ti a; chhiatna thlenga chhanchhuahna leh a ṭul ang thawktute inpekna fakawm a tih thu a sawi.

Sorkar thuchhuah tarlan danin, Maudarh quarry hi Leite ram, Hnahthial district-ah a awm a, C Lalremruata s/o C Lalneihthanga, Leite hmingin March 5, 2020 khan mining permit pek a ni. NHIDCL hnuaia NH-54 kawngpui km. 166-208 inkar (package 4) siamtu contractor ABCI Infra nen inremna siamin, August 31, 2020 thleng permit a nung a, an dil angin July 31, 2023 thleng pawhsei a ni.

Quarry license chu November 11, 2022 aṭang khan tihtawp (suspend) rih a ni a, mi 12 thi zinga la hmuh loh awm chhun Jahidul Islam (27) s/o Samsul Haque, Assam ruang chu zawn mek a ni.

Dr R Lalthangliana hi Lunglei East bialtu MLA Lawmawma Tochhawng, Hnahthial SP Vineet Kumar leh sorkar hotu dang te, NHIDCL leh ABCI hotute leh media mite'n an ṭawiawm.