Mizoramah Bangladesh ráltlân mi 293 an awm mek
Bangladesh aṭangin Mizoramah ráltlân mi 293 an awm mek. Lawngtlai DC Amol Srivastava chuan, Bangladesh aṭanga ráltlânte chu an chanchin hriat a nih veleh a ṭul ang ang district administration-in an buaipui a, chhawmdawlna tur ngaihtuah nghal a nih thu leh sorkar aṭangin ngaihven zui zel an nih thu a sawi.
Kuki-Chin National Army leh Bangladesh sipaite inkah vanga Bangladesh aṭanga sahimna zawnga Mizorama tlan lutte tuamhlàwm dan leh enkawl zui dan tur ngaihtuahin nimin khan Lawngtlai DC Amol Srivastava hoin sorkar hotute leh tlawmngai pawl hruaitute Lawngtlai DC conference hall-ah an ṭhukhawm a ni.
Râltlànte buaipui tura ruat nodal officer TT Beikhaizi, Lawngtlai SDO (Sadar) sawi danin, chhinchhiah chinah Lawngtlai district-ah tun hnaia Bangladesh aṭanga raltlan rawn lut, Mizorama awm mek chu mi 293 an ni a, mipa 132 leh hmeichhia 161 an ni. Mi 293 zinga mi 145 chu kum 18 chung lam an ni a, kum 18 hnuai lam mi 148 an awm.
Parva III-ah community hall, primary school, health sub-centre, anganwadi centre leh high school-ahte ráltlânte khawsak lailâwkna tur ruahman a ni a; district administration aṭangin vil reng niin, ei leh in, mutbu leh ni tin mamawh zualpui eng emaw zat pek a nih tawh thu sawiin; pawl, kohhran leh mimal anga ráltlânte chhawmdawlna tura hma latute chungah lawmthu a sawi.