Zu khap hnuah zu vanga police thi an tlem - Lalchamliana

MNF adviser Lal­cham­liana, Home minister ni bawk chuan nimin khan Mizo Hnam Rûna inkhawmah thu sawiin, Mizorama zu khap hnuah Mizoram police zingah zu vanga thi an tlem sawt niin a sawi a; Mizoramin Assam lama a ram chin anga a chhàl chu Assam-in pe tawp ta se, Mizote'n an duh tak tak ang em tih ngaihtuah tham a nih thu a sawi bawk.

Lalchamliana chuan, "MNF sorkarin kohhran leh mipui duh dana zu a khap hnuah zu vanga thi police an tlem. Ruihhlo do tura Central YMA-in Central Anti Drugs Squad an din hi ṭha ka ti a, kan thlàwp ṭheuh a pawimawh," a ti a; mahni awmna hmun ṭheuhah CADS hmalakna ṭawiawm turin Mizoram mipui a sáwm.

State ramri chung­chang sawiin Home Minis­ter chuan, "Assam nena kan ramri chung­changah hian Boundary Committee duh dan ang zelin kan kal dawn. Mizoramin kan hauh mek 1875 Innerline Forest area hi kan duh ang ngeiin Assam hian min pe ta se la, assembly constituency panga rìn luh a ngai dawn a, kan duh tak tak ang em, tih hi zawhna lian tak, opinion poll lak hialna àwm a ni. Mi ṭhenkhatin 'Kan ûm chhuak vek anga ni mai lawm' an ti ngawt a, tunlai khawvelah chutiangin a chêt theih tawh loh tih kan hriat tlan a ṭha," a ti.

Tun hnaia Assam mi­nister-te nen an inbiak­naah Mizoram kuhva thar hralhnaa harsatna chungchang sawi a nih thu sawiin Lalchamliana chuan, kuhva hring Assam-in a dang ringawt hi a dik lo a, tihtawp dan zawn ni se, Home department-a DIG level-ah sawihoa chinfel dan zawn ni rawh se, tia thu dah a nih thu a sawi.

Lalchamliana sawi danin, Guwahati-a Assam minister-te nen an inbiak laiin Assam Chief Minister-in amah a bia a; Assam CM chuan kuhva hring sumdawnna tàwp thut chu ama tihtawp a ni lo a, Union Ministry thua tihtawp a ni. Union Home minister Amit Shah a dàwr dawn a, chutah chuan a sawi chhuah tur thu leh Mizoram CM pawhin Amit Shah chu lo dawr ve se a duh thu a sawi a ni.

Myanmar aṭanga kuhva rawn lut chung­changah Chama chuan, "Myanmar aṭanga kuhva rawn lut dang turin Mizoram sorkarin theih­tawp a chhuah. Kawngpui dunga check-na tur hmun hnihah siam a ni tawh. Heti chung hian 100% kan man thei hauh lo," a ti. Assam Rifles-in Myanmar ramri an veng a, BSF-in Bangladesh ramri an veng tih sawiin, "Duty an lo paltlang leh zel tho mai a, Mizoram sorkar tih theih bâk a nih avangin vawiin thlengin duh angin kan la titawp thei lo a ni," a ti bawk.

Lalchamliana chuan, "Kuhva hi amah mai hian dan phal loh a ni lo a, export/import item-ah pawh a tel. Mahse, dan anga insumdawn tawnna kalpuina hnuaiah chauh a ni tur a ni a, border trade mumal kan neih hnuah chuan legal item a ni ang," a ti a; border trade mumal a la awm loh avangin tunah chuan dan loa lak luh a nih thu a sawi.

MNF Adviser chuan, party pathum - ZPM, Congress leh BJP hruaitute chu MNF party chhûl chhuak vek an nia sawiin, "Engati nge MNF an chhuahsana pawl danga an awm? Policy leh thil dang a awm lo, leadership an chan loh vanga pawl danga awm, pawl din chawp an ni," a ti.