KHAWTHLIR

Aizawl Civil Hospital (ACH) leh Lunglei Civil Hospital (LCH)-ah April thla chhung khan OPD/casualty-ah inentir mi 19,583 an awm a, mi 975 admit an ni. Nau piang 317 awmin, ACH-ah mipa 145 leh hmei­chhia 124 an ni a, LCH-ah mipa 31 leh hmeichhia 17 an ni. Mitthi ACH-ah 58 leh LCH-ah 13 an awm. Civil hospital pahnihah hian laboratory-a enfiah mi 56,744 an awm a, x-ray hmanga enfiah mi 1,524, ultrasound hmanga en mi 501, CT scan hmanga endik mi 87, ECG hmanga en mi 475 leh dialysis tihsak mi 417 an awm bawk.

Serchhip Chanmari Vengthar Branch KṬP chuan nimin khan Ser­chhip District Hospital-ah thisen unit 10 an pe a, petute mipa pariat leh hmeichhia pahnih an ni. Mamit Luangpawl ṭhalaite pawhin Thawhṭanni khan Luangpawla VFDC Hall-ah Mamit District Hospital tan thisen unit 10 an pe bawk.

Covid-19 donaa hman atan nimin khan pawl paliin Chief Minister's Relief Fund-ah Rs. 2,65,500 an chhûng lut. CM Relief Fund-ah hian hripui dona atan bika sum thawh chu cheng nuai 764 a tling tawh a ni.

Khawzawl district bawrhsap H Lianzela chuan Thawhṭanni khan hmarchhak state dang aṭanga lo hawte khung hranna hmun (quarantine centre)-te a tlawh a; khung hran mekte tana ei leh in buaipuitute kâwmin, ei leh in din­hmun leh kal zel dan turte a sawipui. 

Champhai DC mawh­phurhna la mektu Mark Lalthanliana, SP Rex Zarzoliana Vanchhawng leh sorkar official dangte'n nimin khan Champhai district mi, Mizoram páwna tangkhang haw turte khung hranna turte an endik. State páwn aṭanga Champhai district-a haw tum inhriattir tawh chu nimin thleng khan state 10 aṭangin mi 325 an tling tawh a; haw tur zat hi a danglam deuh reng bawk.

Mizoram sorkarin inkhàrkhip thawh thumna, May 4-17, 2020 chhunga kalpui atana inkaih­hruaina a siam chu ṭhenkhat tihdanglam a ni.

Inkaihhruaina Clause C-a bungraw chaw luttute'n mCO­VID-19 mobile application-a mPass hmangin declaration an thehlut ngei tur a ni, tih chu driver zingah smartphone nei lo leh Mizo/English chhiar thiam lo tan a harsa deuha hriat a nih avang leh, entry point-ahte internet a ṭhat vek loh avangin mPass hmang kher loin, kalphung hmasaa declaration form (lehkha pheka chhut) chu declaration angah pawm tura tih a ni.

Clause-F hnuaia intlàn chhâwkin a huam loh tur zingah sorkar leh private damdawi-ina thawkte lirthei telh belh a ni a; Clause-G hnuaia hmai tuam chungchanga 'páwn chhuak' tih chuan mahni in chhung leh hmun fála awmte a huam lo bawk.

Nimin khan Hnahthial DC conference hall-ah Hnahthial DC Vanlalmawia leh Mizoram sorkara Agriculture Development Board member Lalropuia Pachuau leh Lalsangliana Hnamte leh sorkar official-te an ṭhukhawm a, Hnahthial district-a lo neih dan dinhmun an sawiho. 

Hnahthial SDAO C Vanlalhruaia chuan, kuminah Hnahthial Sub-Division chhunga thingtlang lo vah zau zawng chu hectare 1,106 a nih thu leh Covid-19 lèn hnuah hectare 19-a zau chul rih belh a nih thu a sawi.

Disaster Management & Rehabilitation (DMR) department chuan Mizoram páwna Mizo tangkhang lo haw turte khung hranna atan district pathumah quarantine facility panga a ruat belh a, chu'ngah chuan mi 257 an awm thei dawn.

Quarantine facility atana thlan tharte chu - Aizawl district-ah Darlawn Tourist Lodge, mi 15 awm theihna; Khawzawl district-ah JNV, mi 192 awm theihna leh St. Joseph’s School, mi 15 awm theihna; Saitual district-ah Mimbung High School hostel, mi 20 awm theihna leh Hriang­hmun Middle School, mi 15 awm theihna turte a ni. Quarantine facility atana thlan tawh Khawzawl Vengthar YMA Hall chu paih leh a ni thung.