Politics hi game anga khel loin Rawngbawlna anga thawh a ngai - ZPM Vice President

ZPM vice president Rev. Dr K Thanzauva chuan nimin khan an party pisaa inkhawmah thu sawiin, Mizoramin ram tana inhlàn ngam, tui ral ngam politician a mamawh thu leh politics chu game anga khel loin, mission rawngbawlna anga thawh a ngaih thu a sawi.

Rev. Dr K Thanzauva chuan, "Ram tana inhlàn ngam, tui ral ngam politician kan mamawh. Chì hian vawnhimna leh tuina a nei a, a tithianghlim thei bawk a, amaherawhchu, chu'ng hna thawk tur chuan a tui ral a ngai a ni," a ti.

Mizoram buai hnuah kum 40 dáwn Mizoramin hmasawnna a sual thu sawiin K Thanzauva chuan, "Beisei ram kan thleng pha lo. Vawiin thlengin kutdawh ram kan la ni reng... Tu nge kan ram hi tihmasawn ang? Tu kutah nge awma kan hriat? Tu nge mawhphurtu? Kan hriat leh kan thiam ang tâwkin taima leh rinawm takin thawk ila, tun aia hian nasa takin hma kan sawn thei a ni," a ti a; ZPM party chuan kalphung a ṭha tâwk lo a, thlak a ngai an tih avangin kalphung thar an chhawp chhuak tih a sawi.

Dr K Thanzauva chuan, kalphung thar a taka chantir turin tui ral ngam a ngaih thu sawiin, "Sorkarna kan siam hunah kan chief minister leh cabinet minister te, MLA leh councillor te, kan ram tana thawktu sorkar hnathawkte an tui ral ngam a ngai. Party hruaitu - general headquarters, block leh unit hruaitute pawh kan tui ral ngam a ngai a ni," a ti.

'Tu kutah nge kan ram hi awm se kan tih?' tih ngun taka ngaihtuah a ṭul thu sawiin Thanzauva chuan, "Ram tana tih tak zeta thawk tur hian Kristian moral leh inpekna kan mamawh. Tuna politics game kan khelh hian khawi ram mah kum 40 chhungin min thlen lo tih kan hria," a ti a, politics chu game anga khel loin, mission rawngbawlna anga thawh a ngaih thu a sawi.

ZPM Vice President chuan, NLUP leh SEDP-te'n Mizote chu Kanan ram a hruai lut dawn lo tih a chian tawh thu a sawi a, "Tunah hian kan thupui, hmangaihna leh rorelna dik hi kan enchhin a ṭul tawh. Kristian principle, hmangaihna leh rorelna dik hi ZPM policy a ni a, ‘I ram lo thleng rawh se’ tiin kan aupui a ni," a ti bawk.