MKHC-in kuhva hralhnaa harsatna Union Minister Barla hnenah an thlen

Sorkar laipuia Minority Affairs minister of state John Barla chuan nimin khan Raj Bhavan-ah Mizoram Kohhran Hruaitute Committee (MKHC) puipate a kâwm. MKHC hruaitute chuan, Mizo-rama kuhva huan neitute harsatna a rang lama sutkian a ṭul thu leh India rama Kristiante'n harsatna an tawhah ṭanpui an mamawhnate an thlen.

MKHC hruaitute chuan, Assam state-ah Mizorama kuhva tharte kaltlangpui phal a nih loh thu leh a chhante an tarlang a; a rang lama sutkian a nih theih nan hma la turin Union Minister an ngen a ni.

MKHC hruaitute chuan, India ramah Kristiante'n harsatna an tawh mek thu te, Foreign Contribution Regulation Act (FCRA) hnuaia inziak lut kohhran leh kohhran hnuaia páwlte'n ram páwn aṭangin ṭanpuina an dawn theih tawh loh thute an sawi a; chinfel dan ngaihtuah turin Minister an ngen.

Tun hnaiah India ram state hrang hrangah Anti Conversion Law aṭangin Kristiante tihduhdahna leh harsatna tam tak a thleng chu ṭha lo an tih thu an sawi a; India ram nihna - sakhaw ṭan bik nei lo sorkar (secular state) nih phung nen inmil lo an tih thu MKHC hruaitute chuan an sawi bawk.

Minister John Barla chuan, MKHC hotute thu thlen chu a theih anga bawhzui a tum thu a hrilh a; Kristiante harsatna chungchang chu Kristian páwl hrang hrang hruaitu intélkhawmte'n sorkar laipuia thuneitute la sawipui se ṭha a tih thu leh, sawihona neih a nih theih nan theitawp chhuah a tum thu a sawi.

Mizorama sorkar hmalakna hrang hrangah kohhran hruaitute'n mawhphurhna pawi­mawh tak an nei tih a hriat thu sawiin John Barla chuan, "Kohhran rawngbawlnaah miretheite ṭanpuina scheme hrang hrang pawh inzirtir ṭhin ni se, tun ai hian mipuiin central scheme ṭha tak tak hi an hre chiang zawk ang a, ham­ṭhatna dawngtu an tam zawk ka ring," a ti.

MKHC hruaitute hi Synod moderator Rev. Dr Vanlalnghaka Ralte-in a ho a ni.