PMGSY kawng siam chungchang sawiho

Chief minister Zoramthanga hoin nimin khan Chief Ministers' Office conference hall-ah Pradhan Mantri Gram Sadak Yojana (PMGSY) hnuaia Mizorama kawng siam hna thawh mek leh hmabakte sawiho a ni.

Ṭhutkhawmah hian PMGSY hnuaia hnathawh a ṭhat leh zual theihna tura rawtnate sawiho a ni a; kháwl leh endikna hmanrua ṭha zawk neih te, contract hna chhâwng tam vanga harsatna awm ṭhinte tarlan a ni. State leh national level-a kawng siam hna ṭhat leh ṭhat loh endikna, State Quality Monitors leh National Quality Monitors chu uluk lehzuala kalpui ni se ṭha an tih thu an sawi bawk.

Tarlan danin, PMGSY hi kum 2000 aṭangin India ramah kalpui a ni a, Mizoramah chuan Mizoram PWD chu executing agency a ni. PMGSY-I leh PMGSY-II hnuaiah khaw 231-ah kawng 297 siam a ni tawh a, chu chu belhkhawmin km. 4,238.29-a thui a tling.

Ṭhutkhawmah hian PWD secretary K Lalthawmmawia, Planning secretary Lalmal­sawma Pachuau, PWD engineer-in-chief Bowman leh officer dangte an tel a ni.