Saiphai H/S thar hawn a ni

School Education minister Lalchhandama Ralte chuan nimin khan Saiphai High School building thar leh HSLC examination centre thar a hawng.

Lalchhandama Ralte chuan, Saiphai H/S thar leh HSLC examination centre thar puan a ni ta chuan khawtlang mipui, zirtirtu leh zirlaiteah nghawng ṭha nei se, result ṭha hring chhuak se a duh thu a sawi a; zirtirtute tan zirlaite zirtir chu an missionary hnaah ngaia theihtawp chhuah tur leh, zirlaite chu taima tur te, aia upa zah tur te, tlawmngaihna leh nationalism lamte zirtir tel turin zirtirtute a chah.

Education Minister chuan, Mizoram sorkarin zirna hmasawnna atan theihtawp a chhuah a, hripui léng kara Chief Minister-in zirna hmasawnna tura hma a lakna chu fakawm a tih thu sawiin, "Hun harsat vanga hna lâk a harsa chung pawhin zirna hmasawnna atan School Education hnuaiah CM duhsaknain hna 2,800 dáwn lai lak a ni tawh. State matching share pawh a tum thei zel a ni," a ti.

Sikul hawnna inkhawm­ah hian Serlui bialtu MLA Lalrinsanga Ralte pawhin thu a sawi a ni.