KHAWTHLIR

Thutiam sawi rual
Chief secretary Dr Renu Sharma hoin nimin khan Secretariat-ah Constitution Day puala thutiamna hun hman a ni. Secretariat-a thawkte'n India Constitution-a Preamble an chhiar rual a, India danpui chawi nung zel turin thutiam an chham rual bawk. Constitution Day pualin nimin vek khan sorkar department/pisa hrang hrangah pawh Preamble sawi rual a ni.

Mawhphurhna inhlân
ZPM Ṭhalai president kal chhuak Malsawmzuala Ralte chuan president thar Dr C Lalrammawia hnenah nimin khan ZPM Ṭhalai pisaah president mawhphurhna a hlân. Dr C Lalrammawia chuan, ZPM chu mipui tibeidawngtu tur ni loin, beidawngte tana beiseina siamtu a nih zawk thu a sawi a, "Beiseina kan siam ang a, beiseina tihlawhtling turin theihtawp kan chhuah ang," a ti.

Tarlan phal loh
Aizawl district magistrate Dr Lalhriatzuali Ralte chuan dan loa ramsa/nungcha pèl lai, thangkam hmanga man leh tihlum lai thlalak leh video mipui hmuh tura social media hmanga tarlang lo turin mipui a hriattir.

Thuthlung ziak
Mizoram Dragonfruit Farmers Association, North East Small Finance Bank leh Horticulture department chuan nimin khan thawhhona thuthlung an ziak. Thuthlung hi Mizorama dragon fruit chíngtute'n thar chhuah tam zawk an neih theihna atan te, hlâwk zawka Mizoram páwna thawn chhuah tlaka ṭha a tam theihna atan te, a sâwngbàwlna leh a vawn ṭhatna, cold storage atana hmalak zel a nih theihna atantea ziah a ni.

Lunglei endik
Lunglei district-a YMA sub-headquarters, MJA, Samagra Shiksha, MHIP, MUP, Clean Lunglei leh Joint VC Association aiawhte'n nimin khan Lunglei khawpuia sorkar pisa, bazar, zirna-in, hotel, damdawi-in, veng hrang hrang leh lirthei siamnate an endik. Endikna hi Lunglei Town Sanitation Task Force ruahman anga kalpui a ni.

MLA-in hmanpui
Mamit bialtu MLA H Lalzirliana chuan nimin khan Mamita St. Francis of Assisi High School Parents Day hmanna leh Bethany Society Platinum Jubilee lawmna a hmanpui. MLA hian St. Francis of Assisi HS hnenah dah vawhna (water cooler) leh ball a pe a ni.