Tamil Nadu-a Mizo tangkhangte’n Naktukah Bairabi an thlen beisei

Tamil Nadu-a Mizo tangkhangte’n rélin Mizoram an rawn pan mek a, naktuk May 14 hian Bairabi rél chawlhhmun an rawn thlen beisei a ni. Bairabi rél chawlhhmun hi nimin khan Kolasib DC Dr H Lalthlangliana leh district chhunga sorkar official-te’n an enfiah a, rawn hawte dawnsawn dan tur ruahmannate an siam.

Dr H Lalthlangliana hi Bairabi rél chawlhhmunah hian Kolasib district-a officer, tangkhang hawte dawngsawngtu atana ruatte leh Bairabi khawtlang hruaitute nen an inkâwm a; inkhàrkhip vanga state danga Mizo tangkhang lo haw turte chu ṭha taka lo dawngsawng a, an tih tur ṭheuh fimkhur tak leh him taka hlen chhuak turin mawhphurhna neite a fuih.

Tamil Nadu-a Mizo tangkhang rawn haw turte hi an vaiin mi 975 an ni a; Aizawl district mi 404, Lunglei district mi 48, Serchhip district mi 34, Kolasib district mi 50, Champhai district mi 87, Siaha district mi 139, Mamit district mi 93, Lawngtlai district mi 54, Khawzawl district mi 14, Hnahthial district mi 21 leh Saitual district mi 31 an ni.

Rélin Bairabi a thlen hunah screening point 10-ah enfiah an ni dawn a, enfiah zawhah an hawna tur lirthei hmangin Bairabi khaw chhung paltlang tam lo thei ang bera hawtir an ni ang. Ei leh in inpek dan tur ruahman tawh a ni a, kawng lakah ding khawtlai loin, an thlenna tur hmun pan nghal tur a ni.