MLA-in véngtute a tlawh kual
Covid-19 Medical Operational Team chairman Dr ZR Thiamsanga, MLA, Health & Family Welfare Board vice chairman ni bawk chuan Thawhṭanni leh nimin khan Champhai North bial chhunga khaw hrang hrang, ramria duty post-te leh task force duty-te a tlawh.
Dr ZR Thiamsanga hian Hnahlan, Khuangphah, Diltlang, North Diltlang, Vaikhawtlang, Selàm, Tualchéng, Lungphunlian leh Pàmchung khuaa task force duty post-te a tlawh a; an harsatna leh mamawhte a sawipui.
Covid-19 hripuiin ram ei leh bar, sum leh pai nasa taka a nghawng dawn avangin ei leh bar zawn chungchang sawiin ZR Thiamsanga chuan, nakkum lamah harasatna lian a thlen loh nan uar leh zuala thlawhhma lâk belh a ṭul thu a sawi. MLA hian a tlawh khaw tina task force-te hnenah solar light, buhfai, torchlight leh thil dangte a hlân a ni.
Covid-19 avangin mipui tan chêt chhuah leh damdawi lam thiamte hnena inentir a harsat rih avangin Dr ZR Thiamsanga hian khaw hrang hrangah taksaa harsatna neite a en nghal ṭhin a ni.