Thawhna hmuna awm turin hriattir

Animal Husbandry & Ve­terinary (AH&Vety) department chuan thuchhuah siamin, Assam leh Arunachal Pradesh-ah vawk hri African Swine Fever (ASF) nia rinhlelh a lèn mek avang leh Mizoramah a luh loh nan Vety doctor, field staff leh thawktu dang zawng zawngte chu an thawhna hmunah awm vek tura hriattir an ni a, phalna la hmasa loa mahni thawhna hmun chhuahsan phal a ni lo.

AH&Vety thuchhuah chuan, officer zawng zawngte chu an huam chhunga entry point zawng zawnga task force/police/sipai duty-te hnenah hmarchhak state-ah ASF a lèn mek thu hrilh a, vawk/vawksa leh vawk aṭanga thil siam reng reng Mizorama lak luh a nih loh nan khauh taka hma lakpui tura ngen turin a hriattir a; vawk damlo leh thi (unusual sickness & death) a awmin a rang thei ang bera report a, sample endik turin a ti bawk.

1.    Vawk farm-a thawk ni lo chu farm chhunga luhtir loh tur.

2.    Ran in leh a vel fai taka vawn a, disinfectant hmanga phuh thiang­hlim reng tur.

3.    Disinfectant solution-foot dip eng lai pawhin gate leh ran-in luhka tinah a awm reng tur a ni.

4.    Ran enkawltute farm páwn lamah a tlem thei ang ber chhuah ni se, farm dang leh mi vawk-inte tlawh loh tur.

5.    Farm manager-te'n ran himna turin hma an la tur a ni.