Tourism minister leh director hlui lakah sum hman dik loh thubuai siam a ni

Anti Corruption Bureau (ACB) chuan Congress party-in Mizoramah sorkarna an chelh hnuhnun ber hun laia cabinet minister John Rotluangliana leh Tourism director hlui Biakthanmawia Pautu laka thubuai an ziak lut.

Vanglaini thu dawn danin, Tourism minister hlui John Rotluang­liana leh director hlui Biakthanmawia Pautu te hi Khawzawl Tourist Lodge sakna tur sum hman dik loh chung­changah thubuai siamsak an ni.

Sum hman dik loh zat nia ACB-in an tarlan chu Rs 67,49,000 niin, kum 2018-19 chhunga mi a ni a; Khawzawl Tourist Lodge sakna tur sum hi thil dangah hman a nia hriat a nih thu Vanglaini thu dawnna chuan a tarlang.

Khawzawl Tourist Lodge sak zawk loh a nih chungchangah Lokayukta chuan May 24, 2019 khan complaint an dawng a, an zir chian hnuah May 24, 2019 khan chhui chiang turin ACB an hriattir a ni. ACB-in an chhui chianna chu February 5, 2020 khan Lokayukta-ah thehluh a ni a, chhui zui leh turin Lokayukta chuan February 27, 2020 khan ACB a hriattir nawn.

Lokayukta chuan March 21, 2022 khan a ngaihtuah a, chumi hnu May 13, 2022 khan full investigation ti turin ACB a hriattir leh a, ACB chuan an la chhui zo lo.

ACB hian full investigation an kalpui mek laiin John Rotluangliana leh Biakthanmawia Pautu te lakah thubuai an ziak lut ta a ni.