July-September chhunga CD ratio 56.61%

State Level Bankers' Committee (SLBC) Mizoram chu nimin khan Secretariat Conference Hall-ah an ṭhukhawm a; July-September, 2022 chhunga Mizorama bank leh line department hrang hrang dinhmun an thlirho. July-September chhunga Mizorama bank 24-te credit-deposit ratio (CD ratio) chu 56.61% a nih thu tarlan a ni.

Ṭhutkhawm kaihruaitu SLBC chairman Dr Renu Sharma, chief secretary chuan, Mizorama bank-te CD ratio chu kum kal ta aiin a ṭhat thu a sawi rualin, bank ṭhenkhat, meeting hnuhnung zawk aṭanga hmasawnna nei lote’n state CD ratio an tihhniam thu a sawi.

Dr Renu Sharma chuan, "CD ratio 20% aia hniam nei bank - Yes Bank, Axis Bank leh Federal Bank leh, CD ratio 40% aia hniam nei bank pangate hian financial year 2022-23 chhung hian hma an sâwn ngei ngei a ngai a ni," a ti.

SLBC Chairman chuan, priority sector lamah loan pek uar tur leh sorkar scheme-ah nasa lehzuala loan pe turin Mizorama bank-te a chah a; sorkar laipuiin KCC hnuaia campaign a neih mek Animal Husbandry leh Fisheries-te pawh loan pe chhuak tam tur te, social security scheme hnuaiah Mizoram mipuite thun lut tura beihpui thlâk turtein bank hotute a chah bawk.

Ṭhutkhawma tarlan danin, September 24, 2022 dinhmun angin Mizoramah bank chi hrang 24 awmin, chungte chuan branch 239 an nei. Bank branch 239-te chu public sector bank branch 78, private sector bank branch 37, regional rural bank branch 101 leh cooperative bank branch 23 a ni.

Bank 24-te'n July-September, 2022 chhungin deposit (sum dah luh) cheng vbc. 14,797.16 an nei a, loan (advances) vbc. 8,376.85 an pe chhuak thung a; deposit hmuh aṭanga loan pek zat percentage (CD ratio) chu 56.61% a ni.

Ṭhutkhawmah hian State Bank of India Zonal Office, Silchar-a deputy general manager Lalkholun Hangshing, Reserve Bank of India general manager P Shimrah, sorkar department hotute leh bank hotute an tel.