Governor-in home healthcare training a hawng

Governor Hari Babu Kambhampati chuan nimin khan Falkland Venga Jay Jay Training & Placement Solutions-ah Nightingale Care Services (Home Healthcare) hnuaia training-na a hawng a, training batch hmasa berte hnenah certificate a hlan.

Nightingale Care Services (Home Healthcare) hi in lama damlo, tar chak lo leh enkawl ngai enkawltu turte inzirna hmun a ni.

Dr Hari Babu Kambhampati chuan, Jay Jay TPS-in kum 10 chhunga hma an lak tawhnaah ṭhalai tam takin ram chhung leh páwnah hna an hmuh theih phah tih a sawi a, "He lam hawi zawng hian LESDE leh an thawhpui dangte pawhin skill training course dangte pawh siam belh zel se, ṭhalai tam takin eizawnna an neih phah dawn a ni," a ti.

Ṭhalaite'n sorkar hna an inchan vek lo tih sawiin Larsap chuan, "Kum tin ṭhalai lehkhathiam an awm belh zel a, eizawnna kawng dapin hnathawh tur an mamawh. Mizoramah ringawt thawh tur zawng lo a, state páwn leh ram páwna thawh tur tam tak awmte an ngaihven a hun tawh a ni," a ti a; ṭhalaite tan vocational training leh skill development training ṭha tak buatsaih a ṭul thu a sawi.

Governor chuan, ram páwna hnathawh tur zawngte hnena hna hmuhsak thei nia insawia lem chang tam tam tak an awm tih erawh hriat a pawimawh thu te, hna zawng mekte tan agency lem lakah fimkhur a ṭul thu te, sorkar pawmpui agency-te chauh pan a him thute a sawi bawk.

Jay Jay TPs hi kum 2011-ah din a ni a, mi 600 chuang inzir zo tawhin, mi 400 vel hna hmuhsak an ni tawh. Mi 140 tan seat awmin, hostel a awm nghal a, training chu North Eastern Council (NEC) hnuaiah thla thum chhung neih ṭhin a ni. Inzir zo tawh zinga a tam zawk chu United Kingdom, Singapore, Gulf (Middle East) leh hmun dangahte hna an thawk niin sorkar thuchhuah chuan a tarlang.