Apollo Nursing School zirlaite'n bati chhíin thutiam an sawi

Apollo School of Nursing chuan nimin khan Dawrpui Multipurpose Hall-ah Capping and Lamp Lighting Ceremony vawi 18-na an hmang a, Health & Family Welfare minister Dr R Lalthangliana'n a hmanpui.

Dr R Lalthangliana chuan, nursing chu eizawnna zahawm tak a nih thu sawiin, "Ringtute tan phei chuan Isua rawngbawlna chhawm nung zeltute zinga mi an ni. Damlote tan damna leh hlimna tam tak thlen theitu, inpekna thûk tak nena thawh ngai a ni a, nurse lukhum hian nurse-te nunah hmun pawimawh tak a chang a ni," a ti.

Nurse zirzo tawhte chu Mizoram páwn leh ram dangah tumruhna nena thawk chhuak tura chahin R Lalthangliana chuan, "Mizote ziaa bet tlawmngaihna leh mi harsa zawkte ṭanpui zel duhna thinglung hian Mizo nurse-te hi khawi hmunah pawh fak an hlawh phah a, doctor tam tak pawhin damlo enkawltu atan an duh bik ṭhin," a ti a; teirei peihna leh hna ṭha taka an thawh theih nan hriselna ngai pawimawh turin nurse-te a fuih bawk.

Inkhawmah hian nurse mi 36-te chu lukhum khumtir an ni a, bati chhiin thutiam an sawi a ni.