Khawruhlian Supply kudam thar hawng

Assembly speaker Lalrinliana Sailo chuan nimin khan Khawruhlian Supply Centre-ah supply kudam thar a hawng. Speaker chuan, Mizoram sorkarin ei leh bar a ngai pawimawh a, Mizote rilṭám tuihâla an awm a phal loh thu a sawi.

Lalrinliana Sailo chuan, Mizoram sorkarin ei leh bar a ngaih pawimawh thu sawiin, "Mizote rilṭám tuihâla an awm a phal lo a, chuvangin, nasa takin hma a la mek zel. Kudam neih mai hi a tâwk lo a, thawktute pawhin rinawm taka mipui rawngbawl hna a ni tih hriaa an thawh a ngai," a ti a; kudam thar chuan khua leh khua inkarah inlungrualna thar a thlen zel a beisei thu a sawi.

Social media-ah aia upa zah lohna te, kohhran leh pawl ngaihnêpna thu tam tak hmuh tur a awm thu sawiin Speaker chuan, "Social media hman danah fimkhur a ṭul. Mi ṭha, mi dik, ram leh hnam hmangaihtu dik tak Mizoramin kan neih zel theihna turin ṭan lak zel a pawimawh," a ti.

Food, Civil Supplies & Consumer Affairs minister K Lalrinliana pawhin thu sawiin, sorkarin Mizoram hmun hrang hrangah kudam 21 a sak mek thu leh sak zawh thuai beisei a nih thu a sawi a, "Kudam ṭha tak tak kan neih mekah kan ram thar buhfai dah tur a awm mumal lo," a ti a; Mizoram buhfai thar ngei dah a nih thuai theih nan ṭan lak a pawimawh thu a sawi.

Khawruhlian supply kudam hi buhfai quintal 3,000 dah theihna a ni a, Babie Construction & Consultancy Services-in Rs 2,03,57,805 hmangin an sa a ni.