MPF leh political party hotute'n Thawhhona thuthlung an thlirho

Mizoram Peoples Forum (MPF) hruaitute leh political party aiawhte chuan nimin khan Central YMA Committee Room-ah thawhhona thuthlung an thlirho.

Ṭhutkhawm hi MPF president Rev. Dr Vanlalnghaka Ralte-in a kaihruai a, MPF general secretary hlui Upa Lalramthanga'n inthlan dawna thawhhona thuthlung ṭobul te, an siam tawh dan leh inthlan dawn apianga thlirho ṭhin a nih thute sawiin, rawtna thar siam a nih dan a sawi hawng nghal.

Political party hrang hrang aiawhte chuan thawhhona thuthlung siam thar tura rawtnate an sawi a, MPF-ah kohhran pawl dang la tel lote an tel ve ngei theihna atan ṭan lakzel a ṭul thu an sawi lang bawk.

Thawhhona thuthlung atana rawtnate chu political party-te'n an party ṭheuhah an sawiho leh ang a, chumi hnuah MPF-te nen an sawiho leh dawn a ni.

Ṭhutkhawmah hian political party aṭangin - BJP, Congress, MNF, Peoples' Conference leh ZPM aiawh mi pahnih ṭheuh an tel a ni.