Ni 2 chhungin mi 18 sample endik

Zoram Medical College (ZMC) Covid-19 Testing Laboratory-ah May 11-12 chhung khan Covid-19 vei rinhlelh mi 18-te swab sample endik a ni a, result nghah mek a ni.

Thawhṭanni leh nimina swab sample endikte hi State Referral Hospital (SRH)-a enkawl lai leh district hrang hranga mite an ni a; an zingah Rapid Test Kit (RAT) hmanga endiknaa rinhlelhawm, laboratory-a endik nawn tura tihte an tel. SRH-ah hian Covid-19 leh a kaihhnawih vangin mi 20 enkawl mek an ni a, Risk Ward-ah mi panga, SARI Ward-ah mi pasarih, Make Shift ICU Ward-ah mi pakhat leh Holding Ward-ah mi pasarih an awm mek. Covid-19 vei finfiah tawh an la awm rih lo.

Mizoram luhka hrang hranga screening point-ah nimin khan mi 741 enfiah niin, Covid-19 vanga enfiah tawh zawng zawng chu mi 81,276 an ni a; nimin vek khan quarantine facility-a khung thar mi 31, mahni ina inkhung hrang (home quarantine) mi paruk, Rapid Antibody Test (RAT)-a enfiah mi 148 leh RT-PCR Test paruk an awm.

Covid-19 chungchanga hmalak ṭan aṭanga nimin tlai dar 5 thleng khan quarantine facility-a dah mi 2,259, home quarantine mi 7,208, RAT mi 2,342, RT-PCR test mi 10 an awm tawh a; rinhlelh thila swab sample endik mi 224 leh damdawi-ina admit mi 50 an awm tawh bawk.